Jetisý oblysy qylmystyq ister jónindegi mamandandyrylǵan aýdanaralyq sotynyń ǵımaratynda kisi qolynan qaza tapqan Sherzat Polattyń ólimine qatysty kezekti sot otyrysy ótip jatyr, dep habarlaıdy Bairaqmedia.kz.

Sotqa kýáger retinde Talǵar aýdany polısıa basqarmasynyń patrúldik polısıa qyzmetkeri Jánibek Ámiraqyn shaqyrylyp, odan jaýap alyndy. Ol aıyptalýshy Darhan Áskentaıdy tanıtynyn, onymen bir synypta oqyǵanyn atap ótti. Al, basqa aıyptalýshylar men jábirlenýshilerdi tanymaıtynyn aıtty.

«Qamajaı» dúkenine barǵan jerden kezde qandy kórdim. Adamdardan balanyń pyshaqtalǵanyn, ákesi emhanaǵa alyp ketkenin bildim. Golf pen Mercedes avtokóligi týraly bildik. Rysqulov aýylyna qaraı júrgen kezde qara Golf avtokóligin kórdik. Barǵan kezde ishinde eshkim bolmady. 102-ge qaıta habarlasyp, avtokólikti tapqanymyzdy aıttyq. Sol kezde bir jigitti baıqadyq, ony áriptesimiz ekeýmiz ustadyq. Ol suraý barysynda tóbeleske qatysty bar ekenin aıtty, ol Darhan Áskentaı bolyp shyqty. Ony birden tanymadym. Kózi isip ketken. Taý jaqta jaryq joq», – dedi Jánibek Ámiraqyn.

Kýáger sottalýshy Darhan Áskentaı ustaý kezinde qarsylyq tanytpaǵanyn jetkizdi. Aıtýynsha, ol qatty mas kúıde bolǵan.

Eske sala ketsek, keshe qaıǵyly oqıǵa kezinde sol jerde bolǵan, kýáger retinde tanylǵan qyzdardan jaýap alynǵan bolatyn. Olardyń biri Elmıra Nurbekovanyń sózderine prokýror kúmán keltirgen edi.