Jetisý oblysy qylmystyq ister jónindegi mamandandyrylǵan aýdanaralyq sotynda kisi qolynan qaza tapqan Sherzat Bolattyń marqum naǵashy aǵasy Nurqanat Ǵaıypbaevtyń kózi tirisinde bergen jaýaby oqyldy, dep habarlaıdy Bairaqmedia.kz.

Tergeý barysynda Nurqanat Ǵaıypbaevtan alynǵan jaýapty prokýror Dana Sársenbaı oqyp berdi.

«Men Nurbolmen qaıtadan sóılestim. Oǵan «Mynany ýshyqtyrmaı-aq qoıaıyq, bárin istep beremin» dedim. Sol kezde Nurbol «Baýyrym, keshirim surap tursyń ǵoı» dep, sol jerde toqtady. Osylaı sóılesip turǵan kezde qyzyl tústi Hyundai Accent kóligi kelip toqtady, artynan qara Mercedes «kaban» kóligi de keldi. Sol kólikterden birneshe jigit shyqty. Hyundai Accent kóliginen 3-4 jigit, al Mercedes-ten Abzal, Nurkıas, Shyńǵys jáne taǵy bir jigit pen eki qyz shyqty», – dedi ol.

Onyń aıtýynsha, eń birinshi Nurqıas kelip, olar bir-birimen amandasqan.

«Sosyn men dúken jaqqa bettedim. Sol kezde Hyundai Accent kóliginen shyqqan Chıka esimdi jigit amandasty. Men oǵan: «Seniń túriń tanys qoı» dedim. Ol «Men shalmyn ǵoı» dedi. Men «Seniń jasyń otyzdar shamasynda shyǵar» dedim. Ol kúlip, dúkenge bet aldy da, esikti ashyp turyp, artyndaǵylarǵa: «Delaıte!» dedi de, ishke kirip ketti. Sol sátte bári men jaqqa qaraı jyljydy. Men Nurkıastyń Ahmet esimdi balany judyryqpen urǵanyn kórdim. Bala qulap, basyn betonǵa uryp, esinen tandy. Abzal ony jaǵasynan kóterip jatqanda men ony toqtatyp: «Bala ǵoı, ne úshin uryp jatyrsyń?» dedim de, Ahmetke: «Qash!» dedim. Ol joldyń arǵy betine qaraı qashyp ketti», – dedi Sherzattyń aǵasy.

Sol sátte, onyń aıtýynsha, oǵan da shabýyl jasalǵan.

«Nurqıas meni judyryqpen urdy. Sol kezde men onyń soqqysyn ótkizip jiberip, ony keýdesinen bir urdym. Osy kezde dúken ishinen shyqpaq bolǵan aǵam Qarjaýbaı shyǵa almaı turady. Esikti qyzdardyń biri aıaǵymen tirep turǵanyn kórdim. Ekinshi qyz Mercedes kóliginiń janynda boldy. Sol kezde pyshaq shyǵyp bastady. Iaǵnı, Mercedes kóligimen kelgen qyzdyń bireýi avtokólikten pyshaqtardy berip turdy. Birinshi Nurqıastyń qolyna keldi. Men olarǵa «E, jigitter bir-birimizge neǵylmaı, normalno shesheıik. Boldy, jigitter, qoıyńdarshy» dep aıttym. Sebebi, pyshaq kórgen soń qoryqtym. Nurqıas maǵan eki ret pyshaqpen sermedi, biraq men ony ótkizip, ony ıeginen bir urdym, ol jerge qulap tústi. Sol sátte onyń artynda turǵan Abzal maǵan qaraı júrdi», – dedi Nurqanat Ǵaıypbaev.

Sol sátte ol Sherzattyń qaıdan paıda bolǵanyn baıqamaı qalǵanyn aıtty.

«Ol Abzaldy uryp jiberdi. Abzal keıin shegindi. Sol sátte men jaqqa qaraı on shaqty jigit júgirip kele jatty. Men keıin shegingenimde, Sherzat meni qushaqtap: «Qashaıyqshy, Nurqanat aǵa» dep aıtty. Men oǵan «Sen qasha ber, aqyryndap, men amaldaımyn sol jerde» dep, meni qushaqtap turǵan Sherzattyń qolyn ashtym. Sol kezde tóbeles bastaldy. Men barynsha olarmen alystym. Osy kezde 10-15 metr jerde júgirip bara jatyp, Sherzat aıǵaılady «Nurqanat aǵa, mynalar maǵan birdeńe tyǵyp aldy» dep úsh ret aıqaılady. Men jigitterden qashyp júrip, onyń qasyna baryp, Sherzatty qushaqtadym. Koftasyn kóterip qaradym, sol kezde sol jaq arqa tusynan pyshaq kirgenin kórdim. Pnevmatoroks bolmas úshin, jaraqatty alaqanymmen japtym. Sol jerde aıǵaılap «E, jigitter, toqtańdarshy, skoryı shaqyryńdarshy!» dep aıqaıladym, – dedi naǵashysy.

Sol sátte onyń aıtýynsha, olarǵa qaraı segiz jigit jaqyndaǵan.

«Kim bolǵanyn aıta almaımyn – qarańǵy bolatyn. Men Sherzatty denemmen jaýyp, qorǵaýǵa tyrystym. Sol kezde kelgender bizdi uryp, teýip, bir-birimizden ajyratýǵa tyrysty. Sol sátte Abzal meniń oń jaq jambasymnan pyshaqpen urdy. Shydadym. Keıin Nurqıas ta jambasymnan pyshaqtady. Osy kezde Abzal úshinshi ret pyshaq suqty. Bireý meni basymnan tapty, ekinshisi qulaq tusynan temir tárizdi nársemen urdy. Men esimdi joǵaltyp, Sherzatty bosatyp jiberdim. Keıin aǵamnyń áıeli Gúlbara kelip, Sherzatty qorǵaýǵa tyrysty. Odan keıin ne bolǵany esimde joq – esimdi aýrýhanada jıdym», – dedi Nurqanat Ǵaıypbaev.

Eske sala ketsek, Nurqanat Ǵaıypbaevtyń atap ketken eki qyzdan keshe jaýap alynǵan bolatyn. Qylmystyq is boıynsha olar kýáger retinde tanyldy. Olardyń biri Elmıra Nurbekovanyń sózderine prokýror kúmán keltirgen edi.