Talǵar aýdanynda bir top jigit er adamdy uryp-soqqan, dep habarlaıdy Bairaqmedia.kz.

Almaty oblysy polısıa basqarmasynyń málimetinshe, atalǵan derek boıynsha qylmystyq is qozǵalyp, qazir sotqa deıingi tergeý amaldary júrgizilip jatyr.

Aqparatqa sáıkes, oqıǵa 27 sáýirde tańerteń Besaǵash aýylyndaǵy «Nurıa» turǵyn úı kesheniniń aýmaǵynda bolǵan. Alaıda bul jaǵdaı boıynsha polısıaǵa azamattardan aryz nemese habarlama túsken joq. Qoǵamdyq tártipti buzý faktisi áleýmettik jelilerge júrgizilgen monıtorıń nátıjesinde anyqtaldy.

Qazir kóshedegi janjalǵa qatysqan barlyq tulǵalardy anyqtaý jáne ustaý boıynsha sharalar qabyldanyp jatyr. Kúdiktiler qoldanystaǵy zańnamaǵa sáıkes qatań jaýapkershilikke tartylady, – delingen polısıa habarlamasynda.

Aıta ketsek, byltyr 3 qazanda Talǵarda jappaı tóbeles kezinde jasóspirim Sherzat Polatty pyshaqtap ketken bolatyn. Qazir oqıǵa boıynsha 9 adamǵa aıyp taǵylyp, qylmystyq is sotta qaralyp jatyr. 

Búgin Jetisý oblysy qylmystyq ister jónindegi mamandandyrylǵan aýdanaralyq sotynda  Sherzat Polattyń marqum naǵashy aǵasy Nurqanat Ǵaıypbaevtyń kózi tirisinde bergen jaýaby oqyldy.