Almaty oblysynda mekteptiń dárethanasynda oqýshylardy soqqyǵa jyqqan sotqar oqýshy basqa bilim ordasyna aýystyrylǵan. Bul týraly Almaty oblystyq bilim basqarmasy júrgizgen tekseris barysynda anyqtalǵan dep habarlaıdy bairaqmedia.kz
Joǵary synyp oqýshysynyń ózinen kishi synyptyń oqýshylaryn uryp jatqany kórinetin beınejazba áleýmettik jelilerde taraǵan bolatyn. Bul jaǵdaı İle aýdany, Qaraoı aýylyndaǵy №49 mektebinde bolǵany anyqtaldy. Osydaı soń atalǵan bilim ordasynda tekseris bastalǵan-dy.
Aldyn-ala júrgizilgen zertteý nátıjesinde oqıǵa 2024 jyldyń qyrkúıek aıynda oryn alǵany, al quqyq buzýshylyqqa jol bergen oqýshy 2025 jyldyń naýryz aıynda basqa mektepke aýystyrylǵany belgili boldy. Qazirgi tańda oqıǵanyń barlyq mán-jaıyn jan-jaqty ári obektıvti qarastyrý maqsatynda arnaıy komısıa quryldy. Tekserý is-sharalary qoldanystaǵy zańnama talaptaryna sáıkes júrgizilýde. Oqýshylarǵa psıhologıalyq-pedagogıkalyq qoldaý kórsetý, ata-analarmen túsindirý jumystaryn uıymdastyrý, sondaı-aq júıeli sıpattaǵy buzýshylyqtardy anyqtaý jáne olardyń aldyn alý maqsatynda monıtorıń júrgizilýde, - dep málimdedi Almaty oblysy bilim basqarmasynyń tárbıe jumysy, qorǵanshylyq, qamqorshylyq jáne arnaıy bilim berý bóliminiń basshysy Aıjan İzbasar.
Aıjan İzbasardyń sózinshe, tekserý qorytyndysyna sáıkes oqıǵaǵa qatysqan oqýshylarmen qatar, tárbıelik jumysty tıisti deńgeıde uıymdastyrmaǵan jáne joǵary turǵan organdardy ýaqytyly habardar etpegen laýazymdy tulǵalardyń jaýapkershiligi qaralmaq.
Bul oqıǵa mektep ájethanasynda bolǵan. Tizilip turǵan jasóspirimderdi joǵary synyp oqýshysy birinen soń birin kezekpen uryp shyǵady. Eshbirin aıamaı, basy men denesine soqqy beredi. Balaǵat sózderin de jaýdyrǵan. Al, kishi synyp oqýshylary onyń soqqysy men ádepsiz sózderin únsiz qabyldap turǵanyn baıqaýǵa bolady.
Al, Almaty oblystyq polısıa departamentiniń málimetinshe, qazir kámeletke tolmaǵan balaǵa dene jaraqatyn keltirý faktisi boıynsha is tirkelip, sotqa deıingi tergeý amaldary júrgizilýde. Balalardy tárbıeleý jónindegi mindetterin tıisinshe oryndamaǵany úshin quqyq buzýshy jasóspirimniń jáne oqıǵany beınetaspaǵa túsirgen mektep oqýshysynyń zańdy ókilderi ákimshilik jaýapkershilikke tartylǵan.
Atalǵan jasóspirimder profılaktıkalyq esepke qoıyldy. Sonymen qatar, kámeletke tolmaǵandar isteri jónindegi komısıaǵa qosymsha yqpal etý sharalaryn qabyldaý týraly usynys engizildi. Kámeletke tolmaǵandar arasyndaǵy mundaı zorlyq-zombylyq áreketteri qoǵamdyq tártip pen zańdylyq qaǵıdalaryn óreskel buzý bolyp tabylady. Osy tárizdes quqyqbuzýshylyqtarǵa qatysy bar barlyq tulǵalar zań aıasynda qatań jaýapkershilikke tartylatyn bolady, - delingen Almaty oblystyq polısıa departamentiniń habarlamasynda.
