Almaty oblysy mektepterinde aqsha bopsalaý, tamaq tartyp alý, býllıng, zorlyq-zombylyq máselesi órship tur. Bul týraly bala quqyǵy jónindegi ýákil Dınara Zákıeva aıtty, dep habarlaıdy Bairaqmedia.kz.
Onyń aıtýynsha 7 mektepte oqýshylar arasynda saýalnama júrgizilgen.
Memleket basshysy tapsyrmasynyń aıasynda osy aıda biz memlekettik organdar, Balalar quqyqtaryn qorǵaý komıtetimen birge Almaty oblysynyń 7 aýdanyndaǵy mektepterdegi jaǵdaıǵa iriktemeli tekseris júrgizdik. Ókinishke qaraı, Almaty oblysy İle aýdanynda oqýshynyń basqa balalarǵa qatysty jasaǵan zorlyq-zombylyǵy — oblys mektepterindegi úlken júıeli problemanyń bir kórinisi. Oblys oqýshylarynyń arasynda anonımdi saýalnama júrgizdik, sondaı-aq olardyń anketalaryn zerttedik. Nátıjeleri bizdi selt etkizdi. Qarasaı, Balqash, Talǵar, İle, Eńbekshiqazaq aýdandarynyń mektepterinde balalar aqsha bopsalaý, tamaq tartyp alý, býllıng, zorlyq-zombylyq, sonymen qatar muǵalimder tarapynan, dene shynyqtyrý jáne algebra páni muǵalimderiniń tıisýi týraly jazǵan. Eńbekshiqazaq aýdanynda eki bala muǵalimderdiń kúsh qoldanýynan keıin aýrýhanaǵa túsken, — dedi Bala quqyǵy jónindegi ýákil.
Onyń aıtýynsha, kishi synyp oqýshylary joǵary synyp oqýshylaryna aqsha jınaıtyn jaǵdaı jıi kezdesedi.
Sondaı-aq Jambyl aýdanynyń bir mektebinde balalar kelesi qorqynyshty kórinisti sıpattaǵan. Kishi synyp oqýshylary joǵary synyp oqýshylaryn kórgende qoldaryn aqsha berý úshin birden qaltalaryna salady eken, áıtpese olarǵa kúsh qoldanylady deıdi. Balalar besinshi synyp oqýshysyn top bolyp urý, nasybaı qoldaný (ol keıde jerde jatady dep jazǵan) týraly da jazǵan, — dedi Dınara Zákıeva.
Ýákil mektep ákimshiligi oqýshylar arasyndaǵy atalmysh jaǵdaıdy bilmeıtinin nemese elemeıtinin jetkizdi.
Sonymen qatar olar oqýshylarǵa qatysty kıberbýllıngti jarıalaıtyn anonımdi Instagram-arna týraly habarlap, bul týraly muǵalimderge aıtqandarymen, eshqandaı kómek almaǵan. Odan bólek, balalar kúzde keminde 50 oqýshy qatysqan jappaı tóbeles bolǵanyn aıtty, biraq mektep bul faktini joqqa shyǵaryp otyr, al polısıa mundaı aqparattan beıhabar eken. Osylaısha, mektepterde oqýshylar arasyndaǵy quqyqbuzýshylyqtardy mektep basshylyǵy men qyzmetkerleriniń jasyrýy, balalarmen profılaktıkalyq jáne jeke jumystyń joqtyǵy baıqalady. Mektep ákimshiligi oqýshylar arasyndaǵy jaǵdaıdy bilmeıdi nemese elemeıdi, jasyrady jáne polısıaǵa habarlamaıdy. Budan bólek, kóptegen jaǵdaıda mektepterdiń ózderi anketada býllıng, aqsha bopsalaý jáne ózge de quqyqqa qaıshy áreketter boıynsha rastaýshy jaýaptar berilgenine qaramastan, qorytyndy anyqtamada bundaı jaǵdaılardy 0% dep kórsetken. Sonymen qatar, oblysta tárbıe baǵdarlamalaryn jáne qabyldanǵan zań normalaryn iske asyrý deńgeıi tómen ekenin atap ótken jón. Atalǵan faktilerdiń bárin biz oblys basshylyǵy, polısıa jáne ózge basqarmalarmen ótken qorytyndy jınalysta jarıa ettik. Sondaı-aq, biz oblysqa jáne ýákiletti memlekettik organdarǵa joldanatyn anyqtama daıyndadyq, – dep jazdy ýákil.
