Memleket basshysy Qasym-Jomart Toqaev «Báıterek» ulttyq basqarýshy holdıńi» AQ basqarma tóraǵasy Rýstam Qaraǵoıshındi qabyldady, dep habarlaıdy Bairaqmedia.kz.
Kezdesý barysynda holdıńtiń 2024 jylǵy qyzmetiniń qorytyndylary men 2025 jylǵa arnalǵan jumys jospary tanystyryldy.
Rýstam Qaraǵoıshınniń aıtýynsha, ótken jyly holdıń 6 trıllıon teńgege jýyq qarjylaı qoldaý kórsetken. Onyń ishinde 4,1 trıllıon teńge – iri, orta jáne shaǵyn bızneske, 1,9 trıllıon teńge – turǵyn úı qurylysy salasyna baǵyttalǵan.
Holdıńtiń aktıvteri 14,1 trıllıon teńgege jetip, ınvestısıalyq jáne nesıe portfeli 10,3 trıllıon teńgege deıin ulǵaıǵan. 2024 jyǵly holdıńtiń taza tabysy – 416 mıllıard teńge. Bul qarajat kompanıalar toby sheńberindegi baǵdarlamalardy júzege asyrýǵa jumsalmaq.
Sondaı-aq, prezıdentke «Damý» kásipkerlikti damytý qorynyń bazasynda eki kepildik qory qurylǵany týraly aqparat berildi. Biri – shaǵyn jáne orta bıznesti, ekinshisi – quny 7 mıllıard teńgeden asatyn iri jobalardy qarjylandyrýǵa arnalǵan.
Qasym-Jomart Toqaevqa sheteldik seriktestermen birlesip aýyl sharýashylyǵy, óńdeý ónerkásibi jáne taý-ken metalýrgıasy salalarynda jobalar iske asyrylatyny, bul bastamalar «Astana» halyqaralyq qarjy ortalyǵynyń ıýrısdıksıasynda qurylatyn qorlar arqyly júzege asatyny baıandaldy.
Memleket basshysy ekonomıkanyń turaqty damýy úshin bastamalardy iske asyrýdyń mańyzdylyǵyn atap ótti. Sonymen qatar, «Báıterek» holdıńine ekinshi deńgeıli banktermen birlese otyryp, naqty sektordy qarjylandyrýdy jáne energetıkalyq, komýnaldyq sektorlardy jańǵyrtý ulttyq jobasyn qarjylandyrý máselesin sheshýdi tapsyrdy.
