Қазақстанда ірі сауда, ойын-сауық орталықтарында өрттен зардап шеккендерге келтірілген залалдың орнын толтыру көзделіп отыр. Бұл туралы Қаржы нарығын реттеу және дамыту агенттігі төрағасының орынбасары Мария Хаджиева мәлімдеді,  деп хабарлайды Bairaqmedia.kz.

Оның айтуынша, биыл адамдар көп жиналатын объектілер иелеріне жауапкершіліктің жүктелген сақтандыруын енгізу жоспарда бар. Сонымен қатар апатты тәуекелдерден сақтандыру жүйесін көп деңгейлі ету және бірнеше көзден өтемақы төлеу көзделген. 

Сауда орталықтарында және адамдар жаппай жиналатын ауданы 2 мың шаршы метрден асатын ірі объектілерінде өрттен зардап шеккендерге залалды өтеу қамтамасыз етілмек. Заң жобасы ҚР Парламентінің қарауында.

Мария Хаджиева атап өткендей,  еліміздің аумағында түрлі табиғи апаттар қаупі бар. Бұл – жер сілкінісі, су тасқыны, орман өрттері, құрғақшылық және дауыл. 

«Алматыдағы жер сілкінісі мен еліміздің солтүстігі және батысында су тасқынынан зардап шеккен 224 елді мекен апаттар қаупі бар аймақтарда азаматтардың мүлкін қорғаудың қосымша жүйесін құру қажеттілігін растады. Бүгінгі таңда халықты осындай сақтандырумен қамту көрсеткіші өте төмен – ел бойынша шамамен 3,2%-ды құрайды. Халықаралық тәжірибе көрсеткендей, апатты сақтандырудың тиімді жүйелері әрдайым көп деңгейлі болып табылады және бірнеше көздерден төлемдерді қамтиды. Сондықтан біз мемлекеттік-жекешелік әріптестіктің түрлі нұсқасын, соның ішінде бюджет шығындарын, сақтандыруды және сыртқы қаржыландыруды тартуды қарастырамыз», – деді Мария Хаджиева.

Агенттік қабылданып жатқан шаралар азаматтардың әлеуметтік қорғалуын қамтамасыз етеді және сақтандыру мәдениетін дамытуға ықпал етеді деп санайды.