Shymkent qalasy ákiminiń orynbasary Rýslan Berdenovke oq atý isinen saıası astar izdeýdiń qajeti joq. Bul týraly depýtat Aıdarbek Hodjanazarov aıtty, dep habarlaıdy Bairaqmedia.kz.

Oǵan úsh ret oq atty. Bundaı jaraqattan keıin aman qalý óte qıyn. Óz-ózine kelýi biraz ýaqyt alady. Men ózim de qatty ýaıymdap qaldym. Sebebi Rýslan myrza sportqa, dene shynyqtyrýǵa degen kózqarasy bólek qoı. Bul jerde eshqandaı saıası astar izdeýdiń keregi joq. Bul – jeke bas máselesi. Men aıtylyp jatqan eshbir nusqaǵa senbeımin, qarapaıym ǵana turmystyq qylmys dep oılaımyn. Jaǵdaıǵa baılanysty túrli oılar, nusqalar aıtylyp jatyr, biraq meniń oıymsha, munyń bári oq atqan adamnyń ózin aqtap alý úshin jasaǵan dúnıesi. Máseleniń anyq-qanyǵyn anyqtaýdy quzyrly organdarǵa tapsyrǵanymyz jón dep esepteımin, – dedi Aıdarbek Hodjanazarov.

Eske sala ketsek, 21 sáýirde shamamen 20:30-da Shymkent qalasy ákimdiginiń ǵımaraty mańynda qala ákiminiń orynbasary Rýslan Berdenovke oq atylǵanyn habarlaǵan bolatynbyz. Oǵan tórt saǵattan astam ýaqytqa sozylǵan ota jasalyp, naýqastyń jaǵdaıy turaqty aýyr dep baǵalanǵan edi.