Jetisý óńirinde týrızm salasyna erekshe nazar aýdarylyp otyr. Oblys qurylǵan sátten bastap bul salada 64 jańa nysan paıdalanýǵa berildi. Sol sıaqty Alakól jáne Balqash kólderiniń jaǵalaýyn kútip ustaý úshin eki komýnaldyq mekeme  quryldy. Bul jaıly oblys ákimi Beıbit Isabaev QR Prezıdenti janyndaǵy Ortalyq komýnıkasıalar qyzmeti alańynda ótken brıfıń barysynda aıtty, dep habarlaıdy bairaqmedia.kz Jetisý oblysy ákiminiń baspasóz qyzmetine silteme jasap.

- Jyl saıyn óńirge 2 mıllıonnan astam týrıs keledi. Olardyń kelip-ketýine jáne demalýyna qolaıly jaǵdaı jasaý – basty mindettiń biri. Bıyl jańa «Aqshı-Beskól» elektr jelisi jáne qosalqy stansıasy iske qosyldy. Jaǵalaýdy nyǵaıtý bógetteriniń jáne káriz tazartý qurylǵysynyń qurylysy júrgizilýde. Balqash kóliniń jaǵalaýyna deıin jol, sýmen jabdyqtaý, sý burý, elektr jelileri jetkizildi. Kól jaǵalaýynda 6 komýnaldyq jaǵajaı qarastyrylǵan, onyń 3-ýinde qurylys bastaldy. Endi jaǵalaýdy abattandyryp, jeke ınvestorlardy tartyp, demalys aımaqtaryn salý mindeti tur. Sondaı-aq, Lepsi stansıasynda jańa temirjol vokzalynyń qurylysy bastalyp, keler jyly qoldanysqa beriledi, - dedi oblys ákimi brıfıń barysynda.

Al ekologıalyq týrızmdi damytý maqsatynda «Altynemel» jáne «Jońǵar Alataýy» ulttyq park aýmaqtarynda vızıt-ortalyqtar ashyldy.

Jasylkól kóline jáne Sh. Ýálıhanov memorıaldyq murajaıyna aparatyn joldar jóndeldi. «Burqanbulaq» sarqyramasy jolynyń qurylysy bastaldy.