Jetisý oblysynda aldaǵy eki jylda ónerkásip salasynda 30 jobasyn iske asyrý josparlanǵan. Solardyń qatarynda Jetisý oblysynda qaldyqtardy kádege jaratý jáne qaıta óńdeý zaýyty salynady, dep habarlaıdy bairaqmedia.kz

Bul «Jasyl Jetisý» JSHS jeke ınvestorymen birlesken joba bolmaq. Bul týraly oblys ákimi Beıbit Isabaev QR Prezıdenti janyndaǵy Ortalyq komýnıkasıalar qyzmeti alańynda ótken brıfıń barysynda málimdedi.

Óńir basshysynyń aıtýyna qaraǵanda, Kerbulaq aýdanynda quny 1,3 trln teńge bolatyn «Shoǵyrlandyrylǵan taý-ken qurylys kompanıasy» mega-jobasynyń qurylysy bastaldy. Joba aıasynda 2 230 jańa turaqty jumys orny ashylady, qurylys 2028 jyly aıaqtalady dep josparlanǵan.

Sol sıaqty Taldyqorǵan qalasynda tegistegish bolat shar óndiretin «ME-ELECMETAL» zaýytynyń qurylysy júrip jatyr.

Budan bólek, kelesi jyly Taldyqorǵanda qaldyqtardy kádege jaratý jáne qaıta óńdeý zaýytynyń qurylysy júredi dep josparlanýda. Bul joba «Jasyl Jetisý» JSHS-men birlesip qolǵa alynady.

Jyl sońyna deıin ónerkásip óniminiń kólemi 5%-ǵa artady dep kútilýde. Bizdiń basty maqsatymyz – ınvestısıa tarta otyryp, jańa jumys oryndaryn ashý, daıyn ónimdi óńdeý jáne ony ishki jáne syrtqy naryqtarǵa shyǵarý, - dep atap ótti Beıbit Isabaev.