Túrkistan oblysynyń ekonomıkalyq ahýalyn jaqsartý, óńirge ınvestısıa tartý, otandyq óndiristi damytý maqsatynda josparly jumystar atqarylyp keledi. Búgin osy maqsatta Túrkistanda kezekti joba bastaý alyp, djınsy matalaryn shyǵaratyn kásiporynnyń irgetasy qalandy, dep habarlaıdy bairaqmedia.kz
Mańyzdy is-sharaǵa Túrkistan oblysynyń ákimi Nuralhan Kósherov, «Hygeia Textile Kazakhstan» JSHS-nyń dırektory Jın Óýıı qatysyp, maqta-mata jibin ıirý men djınsy matalaryn óndirý jelileriniń qurylysynyń kapsýlasyn saldy.
– Búgin Túrkistan óńiriniń jeńil ónerkásip salasynda strategıalyq mańyzdy jobanyń irgetasy qalanýda. Arnaıy ekonomıkalyq aımaqta «Hygeia Textile Kazakhstan» JSHS-niń djınsy matalaryn óndirý zaýytynyń qurylysy bastalady. Memleket basshysy bıylǵy Joldaýynda elimizdiń jańa ekonomıkalyq baǵytyn aıqyndap berdi. Joldaýdyń basty ıdeıasy – memleketimizdi ınovasıa men sıfrlyq tehnologıaǵa negizdelgen ekonomıkaǵa kóshirý. Birinshiden, ekonomıkany ártaraptandyrý mindeti qoıyldy. Bul rette biz Túrkistan oblysynda maqta klasterin damytýdy bastap kettik. Budan bylaı óńirdegi maqta 100 paıyz ózimizde óńdelip, daıyn ónimder shyǵarylady. Solardyń biri – búgin irgetasy qalanǵan zaýyt elimizdiń toqyma óndirisin jańa deńgeıge shyǵarady. Munda jylyna 30 myń tonna maqta-mata jibi men 10 mln metr djınsy matalary óndiriledi. Daıyn ónimder Eýropa men Ortalyq Azıa elderine eksportqa shyǵarylady. Joba tolyq jeke ınvestısıa esebinen júzege asyrylýda. Bul – Túrkistan oblysyndaǵy ıvestısıa tartý jumystarynyń jarqyn jemisi. Bizdiń aldymyzda Túrkistan oblysyn ózin tolyq qamtıtyn ári tereń óńdeý salasy damyǵan óńirge aınaldyrý mindeti tur. Óıtkeni, Túrkistan – jeńil ónerkásipti damytýǵa qolaıly óńir. Bul jańa zaýyt – ımportty almastyrýǵa, eksporttyq áleýetti arttyrýǵa baǵyttalǵan iri joba. Osy nysan iske qosylǵanda Túrkistan – Qazaqstandaǵy toqyma ortalyqtarynyń birine aınalary anyq. Sondyqtan jobaǵa atsalysqan ınvestorlarǵa alǵysymdy bildiremin! Jańa joba sátti júzege asyp, Túrkistannyń óndirisi damı bersin! – dedi Nuralhan Oralbaıuly
Atalǵan nysanda jylyna 10 mln metr djınsy matalary óndirilmek. Jobanyń jalpy quny 23,3 mlrd teńgeni quraıdy. Sondaı-aq munda myńnan asa jańa jumys ornyn qurý kózdelgen. Nysannyń jalpy aýmaǵy 20 gektardy qamtıdy.
Zaýyt jumysyna qajetti jabdyqtar tolyq zamanaýı tehnologıalarmen qamtylady. «Turan» arnaıy ekonomıkalyq aımaǵynda ornalasqan nysan jeke ınvestor esebinen júrgiziledi. Jobany úsh kezeń boıynsha júzege asyrý josparlanyp otyr.
Jalpy, oblystaǵy ındýstrıaldy aımaqtar, shaǵyn óndiristik parkter men arnaıy ekonomıkalyq aımaqtardyń jumysyn jandandyrý nátıjesinde 10 aıda ónerkásip ónim kólemi 1,3 trln. teńgege jetip, ósim deńgeıi 113,4 paıyzdy qurady.
