Túrkistan oblysyna qarasty Shámshi Qaldaıaqov atyndaǵy oblystyq fılarmonıada ishki daý týyndady. Ánshi, Qazaqstan Respýblıkasynyń «Eren eńbegi úshin» medaliniń ıegeri Narkenje Serikbaeva fılarmonıa dırektory Ǵalymjan Ernazarovqa qatysty áleýmettik jelide synı jazba jarıalap, anaıy usynys jasady dep aıyptady. Oqıǵa qoǵam nazaryn aýdaryp, daý keńinen talqylana bastady.

Osyǵan baılanysty fılarmonıa dırektory Ǵalymjan Ernazarov áleýmettik jelidegi fılarmonıanyń resmı paraqshasy arqyly málimdeme jasap, ózine taǵylǵan aıyptaýlardy joqqa shyǵardy. Ol bul jaǵdaıǵa qatysty zań aıasynda áreket etip jatqanyn jáne sotqa shaǵym túsirgenin jetkizdi, dep jazady azattyq-ruhy.kz.

«Keshegi áleýmettik jelide tarap jatqan vıdeo boıynsha men de óz jaýabymdy bergim keledi. Men – otbasyly azamatpyn, anam bar. Maǵan jáne otbasymnyń atyna qara kúıe jaǵylyp jatyr. Bul máselede meni de zań qorǵaıdy dep oılaımyn. Sotqa shaǵymdandym. Sottyń sheshimin kúteıik. Sodan keıin barlyq áleýmettik jelilerde jarıa etemiz», – dedi Ernazarov.

Sondaı-aq, ol Narkenje Serikbaevanyń «jumystan qýdalaý» týraly málimdemesine jaýap berdi. Dırektordyń aıtýynsha, Serikbaeva uzaq ýaqyt boıy jumysqa kelmegenimen, fılarmonıa ujymy oǵan janashyrlyq tanytyp, qyzmetten bosatýǵa asyqpaǵan.

«Sizder onyń áleýmettik jelidegi paraqshasynan kórip otyrsyzdar, bir kúni Jezqazǵanda, bir kúni Qyzylordada toıda júredi. Ol múlde jumysqa kelmeıdi. Bizdiń qateligimiz – jumysta bolmaǵany úshin qyzmetinen bosatý kerek bolǵanda da janashyrlyq tanytqanymyz edi», – dedi ol.

Sonymen qatar, Ernazarov ánshiniń óz mamandyǵyna qatysty aıtqan synyna da toqtalyp ótti.

«Mamandyǵym sáıkes bolǵandyqtan jáne ónerge janashyr bolǵan soń, bul qyzmetti atqaryp otyrmyn. Shetelge issaparlar resmı negizde júzege asady: elshi haty, basqarmanyń ruqsaty bolady. Bul qarajatty bosqa shashý emes. Astana kúnin atap ótý maqsatynda uıymdastyrylǵan issapar», – dep túsindirdi fılarmonıa basshysy.

Eske sala keteıik, buǵan deıin ánshi Narkenje Serikbaeva áleýmettik jelide vıdeo jarıalap, fılarmonıa dırektory tarapynan anaıy usynys estigenin, sondaı-aq jumystan shettetilip jatqanyn aıtqan bolatyn. Qazirgi ýaqytta bul daýǵa qatysty másele sotta qaralyp jatyr.