Ulttyq dombyra kúni qarsańynda halyq aqyny Nurpeıis Baıǵanınniń shóberesi Nurbek Alpamysuly Baıǵanın tarıhı murany jańǵyrtý maqsatynda erekshe jobany júzege asyrýda, dep jazady bairaqmedia.kz. Ol óziniń babasy – Nurpeıis Baıǵanınniń uly Momyn Baıǵanınge jasap bergen kóne dombyrasyn qaıta jasap, ult jadyn tiriltip otyr.

Aspaptyń túpnusqasy tolyq saqtalmaǵan. Búginge deıin dombyranyń tek qulaǵy jetken. Degenmen, dál osy bólshek Nurbekke úlken shabyt syılap, tarıhı dombyrany túpnusqasyna barynsha jaqyn etip qalpyna keltirýge túrtki bolǵan kórinedi.

Nurbek Baıǵanın qazir Q.Jubanov atyndaǵy Aqtóbe óńirlik ýnıversıtetiniń Vızýaldy óner mamandyǵynyń 3-kýrs stýdenti.Ol babasynyń dombyrasy tutas qazaq halqyna tıesili mura deıdi.

«Nurpeıis atamnyń qolynan shyqqan bul dombyra – bizdiń áýlettiń ǵana emes, búkil qazaq halqynyń kıeli murasy. Momyn atamnyń bala kezinde bul dombyra synyp,  birneshe ret jańǵyrtylǵan,  negizgi túpnusqada dombyranyń qulaǵy ǵana saqtalyp qaldy. Biraq dál osy bólshek – tutas tarıhtyń sımvoly ispetti. Men osy negizde dombyrany qaıta jańartyp, rýhanı murany jańǵyrtyp jatyrmyn», – deıdi jas sheber.

Q. Jubanov ýnıversıtetiniń janynan qurylǵan óner sheberhanasynda jasalyp jatqan bul jumys – tarıhı jadty tiriltýdiń, urpaq sabaqtastyǵynyń jáne ulttyq ónerge degen qurmettiń jarqyn kórinisi. Oqý ornynyń oqytýshylary da bul jobany jas býynnyń tamyryna bet buryp, rýhanı baılyqty baǵalaýy dep esepteıdi.