Elimizde 2027 jylǵa deıin 2 mlrd aǵash otyrǵyzý jumystary júrgizilip jatyr. Bul týraly Ekologıa jáne tabıǵı resýrstar mınıstri Úkimet otyrysynda aıtty, dep habarlaıdy Bairaqmedia.kz.
Vedomstvo basshysynyń aıtýynsha, búginde memlekettik orman qory aýmaǵynda 1,3 mlrd kóshet otyrǵyzylǵan, onyń ishinde Aral teńiziniń qurǵaǵan tabanyna 48,7 mln sekseýil kósheti otyrǵyzylǵan.
Sonymen qatar, eldi mekender aýmaǵynda 15 mln aǵash otyrǵyzý boıynsha tapsyrma oryndaldy.
2024 jyldan bastap orman melıorasıalyq jumystardyń edáýir kólemi iri kompanıalardyń qatysýymen búdjetten tys qarajat esebinen júzege asyrylyp jatyr. Jersinýi men ómirsheńdik deńgeıi joǵary sapaly otyrǵyzý materıalymen qamtamasyz etý maqsatynda orman tálimbaqtaryn qurý jumystary júrgizilip jatyr.
Qazaly qalasyndaǵy 33 gektar alańda qýattylyǵy jylyna 3 mln kóshet bolatyn orman tálimbaǵynyń qurylysy aıaqtaldy. Bıyl aýdany 15 gektar jańa tálimbaqty jobalaý boıynsha jumystar júrgizilip jatyr. Sondaı-aq orman melıorasıalyq jumystarmen aınalysatyn qyzmetkerler úshin óndiristik modýlderdi jetkizý júzege asyryldy.
