Qazaqstandyqtardyń mobıldi aýdarymdary qyrkúıekten bastap tekserile bastaıdy, Bul týraly Qarjy vıse-mınıstri Erjan Birjanov málimdedi, dep habarlaıdy Bairaqmedia.kz.

Onyń aıtýynsha, mobıldi aýdarymdarǵa qatysty zań qabyldanyp, qyrkúıekte kúshine enbek.

 Úshinshi krıterıı – aqsha somasy boıynsha – sony kózdeıtin buıryq ta daıyn. Ol búgin qabyldanǵan zań jobasynan keıin qabyldanýy kerek edi. Zań qabyldandy, ol 60 kún ishinde kúshine enedi. Sáıkesinshe, biz normatıvtik qujatty bekitip, jumysqa kirisemiz. Qyrkúıekte bastalady, – dedi Birjanov.

Sondaı-aq, ol salyq organdary qandaı aýdarymdardy baqylaýǵa alatynyn túsindirdi.

Eger anasy qyzyna, ákesi nemese baýyry bir-birine aqsha aýdarsa, bul jerde eshqandaı suraq týyndamaıdy. Tipti 1 nemese 2 mıllıon teńge bolsa da. Taǵy da qaıtalap aıtamyn: úsh birdeı krıterıı qatar oryndalýy kerek. Birinshi – 100 túrli adam. Eger eki adam bir-birine nemese tipti 10 adam arasynda aqsha aýdarsa, bul krıterııge saı kelmeıdi. Ekinshi – úsh aı qatarynan 100 adam bir adamǵa aqsha aýdarsa. Úshinshi – jalpy soma 1 mıllıon teńgeden asýy kerek, – dep túsindirdi vıse-mınıstr.