Әлеуметтік желіде тараған ақпаратқа сәйкес, ер адам жүк көлігінің дөңгелегін орнатып, үрлеп жатқан кезде шина жарылған. Жарылыстың салдарынан жұмысшы өмірге қауіпті ауыр жарақат алған.
Павлодар облыстық полиция департаменті жұмысшының қаза тапқанын растады.
Денсаулық сақтау басқармасының мәліметінше, жедел жәрдем қызметіне шақырту 7 қыркүйекте сағат 10:30-да түскен. Оқиға орнына жеткен медицина қызметкерлері ер адамның алған жарақатынан қайтыс болғанын анықтаған.
Полицияның алдын ала мәліметі бойынша, қайғылы жағдай жүк көлігіне дөңгелек орнату кезінде болған.
«Еңбекті қорғау талаптарын бұзу дерегі бойынша полиция органдары қылмыстық іс қозғады», – деп мәлімдеді ведомство.
Қазіргі уақытта аталған дерек бойынша сотқа дейінгі тергеу жүргізіліп жатыр. Құзырлы органдар оқиғаның барлық мән-жайын анықтауда.
Тергеу мүддесіне байланысты өзге ақпарат жарияланбайды.
