Түркияның Стамбұл қаласында Қазақстанның 26 жастағы азаматы Айсұлу Бекмаханова қайғылы жағдайда көз жұмды. Алдын ала мәлімет бойынша, бойжеткен ғимараттың шатырынан құлап кеткен, деп хабарлайды Bairaqmedia.kz.
Қайғылы оқиға 2026 жылғы 25 қазанда таңғы сағат 08:00 шамасында Стамбұлдың Шишли ауданына қарасты Эргенекон орамында болған.
Жергілікті БАҚ мәліметінше, бойжеткен алтыншы қабаттағы пәтердің балконынан көрші ғимараттың шатырына өтіп, оның орталық бөлігіне қарай жүрген. Кейін ол бос кеңістіктің үстіне орнатылған қалқаның үстіне шыққан. Алайда құрылымның шыдас бермеуінен ол ғимараттың минус екінші қабатына құлап кеткен. Алған ауыр жарақаттарынан оқиға орнында көз жұмған.
Оқиға орнына жеткен полиция мен жедел жәрдем қызметкерлері бойжеткенді аман алып қала алмаған. Қазіргі уақытта оның өліміне қатысты тергеу амалдары жүргізіліп жатыр. Марқұмның мәйіті сараптама жасау үшін сот-медициналық сараптама мекемесіне жіберілген.
Құқық қорғау органдарының мәліметінше, Айсұлу Бекмаханова Түркияға 2026 жылдың қыркүйегінде визасыз режиммен келген. Алдын ала ақпарат бойынша, ол Стамбұлға Ресей азаматының қасында келіп, онымен бірге бір пәтерде тұрған.
Түрік полициясы қазақстандық азаматтың қандай жағдайда шатырға шыққанын және қайғылы оқиғаның өзге де мән-жайларын анықтап жатыр. Тергеу нәтижесі әзірге жарияланған жоқ.
