Мәнерлеп сырғанаудан Олимпиада чемпионы Михаил Шайдоров өзіне қолдау білдірген барша қазақстандықтарға алғыс айтты, деп хабарлайды bairaqmedia.kz.
«Кейбір мәселелерді жария түрде айтпайынша шешу мүмкін болмайтыны өкінішті. Мен ешқандай мемлекеттік органмен жанжалға барғым келмейді. Бірақ өз атымды көпшілік алдында қаралауға жол бере алмаймын», – деді спортшы.
Мәнерлеп сырғанаушының айтуынша, ол 2025 жылы әлем чемпионатының күміс жүлдесін жеңіп алып, Қазақстан Республикасының еңбек сіңірген спорт шебері атағына қойылатын нормативті орындаған. Алайда барлық рәсімнен өткенімен, бүгінге дейін тиісті куәлігін алмаған.
«Маған қызыл кілем төселген салтанатты рәсім қажет емес. Куәлікті қарапайым конвертпен жіберсе де қабылдар едім. Бұл – он жылдан астам еңбегімнің нәтижесі, спорттық жолымның маңызды бөлігі», – деп атап өтті ол.
Сонымен қатар спортшы Олимпиада ойындарындағы жетістіктері үшін берілетін сыйақыға қатысты ешқандай шағымы жоқ екенін айтты. Оның сөзінше, мұндай төлемдер белгілі бір уақытты талап етеді және бұл бағыттағы жұмыстардың жүріп жатқанына сенімді.
Ал өмір бойы төленетін мемлекеттік төлемдер мәселесіне тоқталған Шайдоров бұл жөнінде қоғамға толық емес ақпарат берілгенін жеткізді.
«Мұндай төлемдерді алу үшін кемінде 20 жыл еңбек өтілі болуы керек. Мен қазір небәрі 21 жастамын. Сондықтан дәл қазір ондай төлемдерге үміт артып отырған жоқпын. Алдағы уақытта соған лайық еңбек етсем ғана бұл мәселе өзекті болуы мүмкін», – деді ол.
Ең үлкен мәселе ретінде Михаил Шайдоров жалақының бес ай бойы төленбей отырғанын атады. Оның айтуынша, өзі сияқты жоғары деңгейдегі бірқатар спортшылар жалақыны Спортты қолдау қоры арқылы қаржыландырылатын федерация мен Спортты дамыту дирекциясы арқылы алады. Алайда қаржыландыру мәселесі шешілмегендіктен, спортшының өзі де, оның командасы да бірнеше айдан бері еңбекақысыз қалған.
Шайдоровтың сөзінше, 2026 жылға арналған жаңа келісімшартты талқылау бойынша байланыс тек мамыр айының ортасында ғана орнатылған. Алайда құжаттағы кейбір талаптар заңдық тұрғыдан сұрақ туғызған.
Атап айтқанда, келісімшартта 2030 жылғы Олимпиада ойындарында медаль жеңіп алу міндеттемесі көрсетілген. Спортшы мен оның командасы бұл тармақты қайта қарауды сұрағанымен, осы уақытқа дейін нақты жауап алмағандарын мәлімдеді.
«Біз келісімшарттағы кейбір тармақтардың қисынсыз екенін ғана айттық. 2026 жылы отырып, төрт жылдан кейін өтетін Олимпиадада медаль алуға кепілдік беру мүмкін емес. Бұл мәселеге заңгерлердің назар аударуын сұрадық», – деді ол.
Сондай-ақ спортшы жаңа маусымға дайындыққа қатысты маңызды мәселелердің де ұзақ уақыт бойы назардан тыс қалғанын айтты. Оның сөзінше, 5 маусымда басталатын оқу-жаттығу жиындары туралы алдын ала хабарланғанымен, бағдарламаларды қою, жиындарды ұйымдастыру және жол шығындарын төлеу мәселелері бойынша нақты жауап болмаған.
«Егер осы уақытқа дейін Олимпиададағы жетістігім үшін берілетін сыйақыны алған болсам, дайындықтың бәрін өз қаражатыммен ұйымдастырар едім. Бірақ әркім өз жұмысын атқаруы керек деп есептеймін. Менің міндетім – күніне үш рет жаттығуға шығып, ел намысын қорғауға дайындалу», – деді Шайдоров.
Үндеуінің соңында спортшы ерекше бастамасын жариялады. Егер маусымға қажетті қаржыландыру толық шешіліп, барлық дайындық жұмыстары қамтамасыз етілсе, бес айдан бері төленбей отырған жалақысының барлығын Балаларды қорғау күніне орай балаларға көмек көрсетуге бағыттайтынын мәлімдеді.
«Бұл менің және маған қолдау білдірген барлық қазақстандықтардың балаларға арналған сыйлығы болсын. Балалар – біздің болашағымыз. Оларды бағалап, қолдауымыз керек», – деп түйіндеді Михаил Шайдоров.
Осылайша, Қазақстанның танымал спортшысы өз атына қатысты айтылған пікірлерге жауап беріп қана қоймай, спорт саласындағы қаржыландыру мен ұйымдастыру мәселелеріне де назар аударды. Шайдоровтың мәлімдемесі қоғамда үлкен резонанс туғызған тақырыпқа жаңа қырынан қарауға мүмкіндік берді.
«Барша қазақстандықтарға қолдау көрсетіп, бейжай қарамағандарыңыз үшін алғыс айтқым келеді. Әлеуметтік желілердегі көптеген жазбалар, жылы лебіздер мен тілектерге толы жеке хабарламаларды жоғары бағалаймын. Сенімсіз ақпараттар легіне ермегендеріңіз үшін рақмет. Сіздердің сенімдеріңіз мен үшін өте маңызды. Кейбір мәселелерді көпшілік алдында айтпайынша шешу мүмкін болмайтыны өкінішті», – деп жазды спортшы.
Айта кетейік, бұған дейін Михаил Шайдоров бес айдан бері жалақы алмағанын айтқан болатын.
