Астанада көпқабатты тұрғын үй кешенінің автотұрағында өрт шығып, құтқарушылар 32 адамды қауіпсіз жерге шығарды. Олардың 13-і – бала, деп хабарлайды Bairaqmedia.kz Төтенше жағдай министрлігіне сілтеме жасап.
Оқиға елорданың Есіл ауданындағы Сарайшық көшесінде орналасқан тұрғын үй кешендерінің бірінде болған. Автотұрақта электр сымдары мен автокөлік шиналары өртеніп, ғимаратты түтін басқан. Оқиға орнына ТЖМ өрт сөндіру бөлімшелері жедел жеткен.
Өртті сөндіру барысында газ-түтіннен қорғау қызметінің мамандары ғимарат ішінен 32 адамды, оның ішінде 13 баланы құтқарған. Министрліктің мәліметінше, құтқарушылар тұрғындарды қауіпті аймақтан дер кезінде шығарып үлгерген. Өрт толық сөндірілді.
Жоғары температураның әсерінен төрт автокөлікке зақым келген. Зардап шеккендер жоқ.
