Үкімет отырысында Премьер-министр кадр тапшылығын азайту үшін білім беру ұйымдары мен жұмыс берушілер арасындағы байланысты күшейту қажет екенін айтты.
«Кадр тапшылығын еңсеру және білім беру жүйесі мен бизнестің нақты сұраныстары арасындағы алшақтықты жою үшін жұмыс берушілер мен салалық қауымдастықтардың қажеттіліктерін білім беру ұйымдарының мүмкіндіктерімен үйлестіру қажет», – деді Олжас Бектенов.
Осыған байланысты Оқу-ағарту министрлігіне Еңбек министрлігі, «Атамекен» ұлттық палатасы және әкімдіктермен бірлесіп, әр өңірде экономиканың басым бағыттары бойынша мамандар даярлайтын салалық кластерлер құру тапсырылды. Даярланған мамандардың біліктілігін тәуелсіз сертификаттау да қарастырылған.
Сонымен қатар колледждерге бөлінетін мемлекеттік тапсырыс өңірлердегі нақты жұмыс орындарының санына қарай қалыптастырылмақ. Ол үшін жауапты министрліктер мен әкімдіктер кәсіпорындарға қанша және қандай маман қажет екенін жыл сайын болжап отыруы тиіс.
Жиналған мәліметтер тұрақты түрде жаңартылып, Enbek.kz жүйесінде жарияланады.
Аталған жұмыстарды жалпы үйлестіру Премьер-министрдің бірінші орынбасары Нұрлыбек Нәлібаевқа жүктелді.
