Алматы қаласында мемлекеттік басқару мен заманауи сараптама сапасын арттыруға бағытталған «Талдау мектебі. Алматы» білім беру жобасының екінші аптасы нәтижелі аяқталды. Осы кезеңде қатысушылар зерттеу әдістемесін меңгеру, үлкен деректермен (Big Data) жұмыс істеу және кәсіби шешендік өнерді дамыту бағытында қарқынды дайындықтан өтті, деп хабарлайды Bairaqmedia.kz.
Біліктілікті арттыруға арналған бірегей алаңда мемлекеттік сектор өкілдері, статистика мамандары, жетекші әлеуметтанушылар мен халықаралық деңгейдегі бизнес көшбасшылары бас қосып, өзара тәжірибе бөлісті. Оқыту бағдарламасының негізгі өзегі — стратегиялық маңызы бар шешімдерді қабылдау үдерісінде аналитикалық ойлау жүйесін қалыптастыру мәселесі болды.
Әсіресе, қалалық инфракұрылым мен заманауи урбанистиканы дамытуда шынайы деректерді тиімді пайдалану жолдары жан-жақты талқыланды. Осы ретте ҚР Стратегиялық жоспарлау және реформалар агенттігі төрағасының орынбасары Олжас Төлеуов зерттеу әдістері мен терең аналитикалық пайымның рөлі туралы салмақты ойларымен бөлісті.
Ал Ұлттық статистика бюросының басшысы Мақсат Түрлұбаев мегаполистің демографиялық және экономикалық өсімінің негізгі драйверлерін жіліктеп, деректердің қала тынысын түсінудегі маңызына тоқталды. Сонымен қатар, Демографиялық процестерді талдау және болжау орталығының басшысы Аяулым Сағынбаева Алматының болашақ даму бағдарын айқындайтын демографиялық трендтерге қатысты өзіндік талдауын ұсынды.
Жоба барысында тек деректерді жинау ғана емес, алынған нәтижелерді өңдеп, аудиторияға қарапайым әрі ұғынықты тілде жеткізу дағдыларына да ерекше басымдық берілді. Бұл бағытта сарапшы Азамат Байғалиев қатысушыларға сапалы аналитикалық жазбалар, баяндамалар мен шолулар дайындаудың практикалық қыр-сырын үйретсе, танымал әлеуметтанушы Гүлмира Илеуова мегаполистің әлеуметтік дамуы мен қоғамдық процестерін ғылыми тұрғыдан талдап берді.
Оқыту марафонының қорытынды кезеңі кәсіби коммуникация мен көпшілік алдында сөйлеу шеберлігін шыңдауға арналды. TEDxAstana конференциясының кураторы, PR және GR саласының сарапшысы Әлия Сандыбай халықаралық TED Talks форматының ерекшеліктері мен ғылыми-көпшілік баяндамаларды есте қалатындай етіп жеткізудің құпияларымен бөлісті.
Бағдарламаның соңғы аккорды ретінде inDrive жаһандық сервисінің негізін қалаушы, белгілі кәсіпкер және қоғам белсендісі Арсен Томскиймен ашық пікірталас ұйымдастырылды. Кездесуде қатысушылар аналитикалық тәсілдер мен заманауи IT-технологиялардың халықаралық бизнестегі практикалық маңызын талқыға салды.
Осылайша жобаның екінші аптасы академиялық ортаны, мемлекеттік аппаратты және нақты экономика секторын біріктірген пәрменді интеллектуалды алаңға айналды.
