Каспий теңізіндегі қайғылы оқиғадан аман қалған сарбаз Ақжол Темірханның анасы Самал Кеуелова ұлының басынан өткен ауыр сәттер туралы айтып берді. Оның сөзінше, Ақжолдың өмір үшін арпалысқан сәтінде естіген бір ауыз сөзі әлі күнге дейін отбасының есінен кетпейді, деп хабарлады Bairaqmedia.kz.
Самал Кеуелова ауруханада жатқан ұлымен сол күнгі оқиға туралы сөйлескенін жеткізді. Ақжол анасына ең қиын сәтте біреудің жігер беріп, шыдауға шақырғанын айтқан.
«Ақжолдың айтуынша, ең қиын сәтте оған Бекет көмектесіп, жігер берген. "Ақжол, досым, шыдашы, құрттай ғана қалды!" деп айқайлаған дауысы оған күш берген екен. Сол күні түнде ұйықтап жатқан балама қарап, көз жасымды тыя алмай жыладым. Аллаға шексіз шүкіршілігімді айттым. Баламның амандығына мың мәрте тәубе еттім», – дейді сарбаздың анасы.
Осы әңгімеден кейін Самал Кеуелова ұлына демеу болған Бекетке міндетті түрде алғыс айтуды ойлаған. Тіпті онымен кездесе алмаса, Атырауға арнайы барып, құшақтап, ризашылығын білдіруге бел буған. Көп ұзамай Бекет пен Никитаның да ауруханаға жеткізілгенін естіген ана сарбаздардың қайта қауышуына жағдай жасауға тырысқан. Алайда олардың әңгімесі кезінде күтпеген жайтқа назар аударады. Ақжол мен Бекет бір-біріне «досым» деп сөйлемейтін болып шыққан. Мұның себебін сұраған анасы ұлының жауабынан кейін ерекше толқығанын жасырмады.
«Бекет сол сәтте Ақжолды тіпті көрмеген екен. Бірақ Ақжол бір дауысты анық естіген. Құлағында қалған сөз – "Ақжол, досым, шыдашы!" Осыны естіген сәтте ойыма бірден Азамат түсті… Өйткені Азамат Ақжолға үнемі "досым" деп сөйлейтін еді ғой», – деп еске алды Самал Кеуелова.
Ананың айтуынша, дәл осы сөздер оған Азаматты есіне түсірген. Өйткені Ақжолға үнемі «досым» деп сөйлейтін сол болған. Каспийдегі ауыр сәтте естілген дауыстың нақты кімге тиесілі екені белгісіз. Дегенмен Самал Кеуелова үшін ұлының есінде қалған сол бір ауыз сөздің орны ерекше. Аман қалған сарбаздың анасы айтқан бұл оқиға өмір мен өлім арасындағы күресте жолдастық қолдау мен үміттің қаншалықты маңызды екенін көрсетеді.
