ۆاتيكاندا جاڭا ريم پاپاسىن سايلاۋ ءۇشىن كونكلاۆ باستالدى دەپ حابارلايدى bairaqmedia.kz

بۇل شىركەۋ تاريحىنداعى 267ء-شى پاپا بولماق. جاڭا پاپانى تاڭداۋ پروسەسى اۋليە پەتر شىركەۋىندە سالتاناتتى مەسسا وتكىزۋمەن باستالدى. قىزىل مانتيا كيگەن كاردينالدار شىركەۋ ىشىنەن ءوتىپ، سيكستين كاپەللاسىنا جينالدى.

بيىلعى كونكلاۆتا رەكوردتىق كورسەتكىش تىركەلىپ، 70 ەلدەن 133 كاردينال قاتىسادى.

سايلاۋ بارىسىنىڭ قۇپيالىعىن قامتاماسىز ەتۋ ءۇشىن ۆاتيكان قاتاڭ ەرەجەلەر ەنگىزدى. كاردينالدارعا سىرتقى الەممەن بايلانىسۋعا تىيىم سالىنعان، سونىمەن قاتار تىڭداۋ قۇرالدارىنىڭ جۇمىسىنا كەدەرگى كەلتىرەتىن جوعارى تەحنولوگيالى جابدىق قولدانىلۋدا.

العاشقى وتىرىستا ءبىر عانا داۋىس بەرۋ وتكىزىلەدى. ەرتەڭنەن باستاپ كاردينالدار كۇنىنە ءتورت رەتكە دەيىن داۋىس بەرە الادى. سايلاۋ ناتيجەسىز اياقتالعان جاعدايدا، سيكستين كاپەللاسىنىڭ شاتىرىنان قارا ءتۇتىن شىعادى.

ال، جاڭا پاپا سايلانعان جاعدايدا، اق ءتۇتىن شىعىپ، شىركەۋ قوڭىراۋلارى سوعىلادى. بۇل الەم بويىنشا شامامەن 1،5 ميلليارد كاتوليكتىڭ جاڭا رۋحاني كوشباسشىسى سايلاندى دەگەندى بىلدىرەدى.

ەسكە سالا كەتەيىك، 2025 جىلدىڭ 21 ساۋىرىندە ريم پاپاسى فرانسيسك 88 جاسىندا ومىردەن وتكەن بولاتىن.