تۇركىستان وبلىسىنىڭ ەكونوميكالىق احۋالىن جاقسارتۋ، وڭىرگە ينۆەستيسيا تارتۋ، وتاندىق ءوندىرىستى دامىتۋ ماقساتىندا جوسپارلى جۇمىستار اتقارىلىپ كەلەدى. بۇگىن وسى ماقساتتا تۇركىستاندا كەزەكتى جوبا باستاۋ الىپ، دجينسى ماتالارىن شىعاراتىن كاسىپورىننىڭ ىرگەتاسى قالاندى، دەپ حابارلايدى bairaqmedia.kz
ماڭىزدى ءىس-شاراعا تۇركىستان وبلىسىنىڭ اكىمى نۇرالحان كوشەروۆ، «Hygeia Textile Kazakhstan» جشس-نىڭ ديرەكتورى جين ءوۋيي قاتىسىپ، ماقتا-ماتا ءجىبىن ءيىرۋ مەن دجينسى ماتالارىن ءوندىرۋ جەلىلەرىنىڭ قۇرىلىسىنىڭ كاپسۋلاسىن سالدى.
– بۇگىن تۇركىستان ءوڭىرىنىڭ جەڭىل ونەركاسىپ سالاسىندا ستراتەگيالىق ماڭىزدى جوبانىڭ ىرگەتاسى قالانۋدا. ارنايى ەكونوميكالىق ايماقتا «Hygeia Textile Kazakhstan» ءجشس-نىڭ دجينسى ماتالارىن ءوندىرۋ زاۋىتىنىڭ قۇرىلىسى باستالادى. مەملەكەت باسشىسى بيىلعى جولداۋىندا ەلىمىزدىڭ جاڭا ەكونوميكالىق باعىتىن ايقىنداپ بەردى. جولداۋدىڭ باستى يدەياسى – مەملەكەتىمىزدى يننوۆاسيا مەن سيفرلىق تەحنولوگياعا نەگىزدەلگەن ەكونوميكاعا كوشىرۋ. بىرىنشىدەن، ەكونوميكانى ءارتاراپتاندىرۋ مىندەتى قويىلدى. بۇل رەتتە ءبىز تۇركىستان وبلىسىندا ماقتا كلاستەرىن دامىتۋدى باستاپ كەتتىك. بۇدان بىلاي وڭىردەگى ماقتا 100 پايىز وزىمىزدە وڭدەلىپ، دايىن ونىمدەر شىعارىلادى. سولاردىڭ ءبىرى – بۇگىن ىرگەتاسى قالانعان زاۋىت ەلىمىزدىڭ توقىما ءوندىرىسىن جاڭا دەڭگەيگە شىعارادى. مۇندا جىلىنا 30 مىڭ توننا ماقتا-ماتا ءجىبى مەن 10 ملن مەتر دجينسى ماتالارى وندىرىلەدى. دايىن ونىمدەر ەۋروپا مەن ورتالىق ازيا ەلدەرىنە ەكسپورتقا شىعارىلادى. جوبا تولىق جەكە ينۆەستيسيا ەسەبىنەن جۇزەگە اسىرىلۋدا. بۇل – تۇركىستان وبلىسىنداعى يۆەستيسيا تارتۋ جۇمىستارىنىڭ جارقىن جەمىسى. ءبىزدىڭ الدىمىزدا تۇركىستان وبلىسىن ءوزىن تولىق قامتيتىن ءارى تەرەڭ وڭدەۋ سالاسى دامىعان وڭىرگە اينالدىرۋ مىندەتى تۇر. ويتكەنى، تۇركىستان – جەڭىل ونەركاسىپتى دامىتۋعا قولايلى ءوڭىر. بۇل جاڭا زاۋىت – يمپورتتى الماستىرۋعا، ەكسپورتتىق الەۋەتتى ارتتىرۋعا باعىتتالعان ءىرى جوبا. وسى نىسان ىسكە قوسىلعاندا تۇركىستان – قازاقستانداعى توقىما ورتالىقتارىنىڭ بىرىنە اينالارى انىق. سوندىقتان جوباعا اتسالىسقان ينۆەستورلارعا العىسىمدى بىلدىرەمىن! جاڭا جوبا ءساتتى جۇزەگە اسىپ، تۇركىستاننىڭ ءوندىرىسى دامي بەرسىن! – دەدى نۇرالحان ورالباي ۇلى
اتالعان نىساندا جىلىنا 10 ملن مەتر دجينسى ماتالارى وندىرىلمەك. جوبانىڭ جالپى قۇنى 23،3 ملرد تەڭگەنى قۇرايدى. سونداي-اق مۇندا مىڭنان اسا جاڭا جۇمىس ورنىن قۇرۋ كوزدەلگەن. نىساننىڭ جالپى اۋماعى 20 گەكتاردى قامتيدى.
زاۋىت جۇمىسىنا قاجەتتى جابدىقتار تولىق زاماناۋي تەحنولوگيالارمەن قامتىلادى. «Turan» ارنايى ەكونوميكالىق ايماعىندا ورنالاسقان نىسان جەكە ينۆەستور ەسەبىنەن جۇرگىزىلەدى. جوبانى ءۇش كەزەڭ بويىنشا جۇزەگە اسىرۋ جوسپارلانىپ وتىر.
جالپى، وبلىستاعى يندۋستريالدى ايماقتار، شاعىن وندىرىستىك پاركتەر مەن ارنايى ەكونوميكالىق ايماقتاردىڭ جۇمىسىن جانداندىرۋ ناتيجەسىندە 10 ايدا ونەركاسىپ ءونىم كولەمى 1،3 ترلن. تەڭگەگە جەتىپ، ءوسىم دەڭگەيى 113،4 پايىزدى قۇرادى.
