پاۆلودار وبلىسىندا كاماز جولدىڭ قارسى بەتىنە شىعىپ كەتىپ، جەڭىل كولىكپەن سوقتىعىستى. سالدارىنان ەكى ادام كوز جۇمىپ، بىرەۋى جاراقات الدى، دەپ حابارلايدى turkystan.kz وبلىستىق پوليسياعا سىلتەمە جاساپ.
پوليسيا قىلمىستىق ءىس قوزعادى. كۇدىكتى جۇرگىزۋشى ۋاقىتشا قاماۋ يزولياتورىنا قامالدى.
الدىن الا مالىمەتكە سايكەس، 12 جەلتوقسان كۇنى "ەكىباستۇز–سولنەچنىي اۋىلى" اۆتوجولىنىڭ 10-شاقىرىمىندا تىركەمەسى بار كاماز جۇك كولىگىنىڭ جۇرگىزۋشى قارسى قوزعالىس جولاعىنا شىعىپ، Great Wall اۆتوكولىگىمەن سوقتىعىسقان. ودان كەيىن ەكى كولىك تە جول جيەگىنە اۋدارىلعان.
"اۆتوكولىكتەر ارنايى ايىپتۇراققا قويىلدى. وقيعانىڭ ءمان-جايى مەن سەبەپتەرى تەرگەۋ بارىسىندا انىقتالادى"، - دەيدى پوليسەيلەر.
پوليسيا دەپارتامەنتى مۇنداي وقيعالاردىڭ الدىن الۋ ءۇشىن جول قوزعالىسىنا قاتىسۋشىلارعا جول قوزعالىسى ەرەجەسىن، جىلدامدىق رەجيمىن قاتاڭ ساقتاپ، اۋا رايىنىڭ وزگەرۋىن ەسكەرۋ قاجەتتىگىن ەسكە سالدى.
