مەملەكەت باسشىسى 1996 جىلعى 1 ساۋىردەگى № 2922 "قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى تۋرالى ەرەجەنى بەكىتۋ تۋرالى" پرەزيدەنت جارلىعىنا وزگەرىستەر مەن تولىقتىرۋلار ەنگىزەتىن قۇجاتقا قول قويدى. جاڭارتىلعان ەرەجە قاۋىپسىزدىك كوميتەتىنىڭ قارجىلىق مونيتورينگ جانە مەملەكەتتىك ماتەريالدىق رەزەرۆتەردى باسقارۋ سالاسىنداعى فۋنكسيالارىن كەڭەيتۋدى كوزدەيدى.

ەنگىزىلگەن تۇزەتۋلەرگە سايكەس، ۇقك ەندى ۋاكىلەتتى ورگاننىڭ سۇراۋ سالۋى نەگىزىندە قىلمىستىق جولمەن الىنعان كىرىستەردى زاڭداستىرۋعا، تەرروريزمدى قارجىلاندىرۋعا جانە جاپپاي قىرىپ-جويۋ قارۋىن تاراتۋدى قارجىلاندىرۋعا قارسى ءىس-قيمىل شەڭبەرىندە ءوز اقپاراتتىق جۇيەلەرىنەن مالىمەتتەر بەرەتىن بولادى.

مەملەكەتتىك جانە جۇمىلدىرۋ رەزەرۆتەرىن باسقارۋ

قۇجاتتا كوميتەتتىڭ مەملەكەتتىك ماتەريالدىق رەزەرۆكە قاتىستى مىناداي جاڭا مىندەتتەرى ناقتىلاندى:

ماتەريالدىق قۇندىلىقتاردىڭ نومەنكلاتۋراسى مەن ساقتاۋ كولەمدەرى بويىنشا ۇسىنىستار ەنگىزۋ؛

جۇمىلدىرۋ رەزەرۆىنەن قۇندىلىقتاردى قارىز الۋ تارتىبىمەن نەمەسە جاڭارتۋ ماقساتىندا شىعارۋ تۋرالى شەشىمدەر قابىلداۋ؛

رەزەرۆ قۇندىلىقتارىن ساقتاۋ مەن جاڭارتۋدى ۇيىمداستىرۋ؛

نومەنكلاتۋرا وزگەرگەن جاعدايدا نەمەسە جاڭارتۋ كەزىندە ماتەريالدىق قۇندىلىقتاردى باسقا
مەملەكەتتىك ورگاندارعا وتەۋسىز بەرۋ؛
رەزەرۆ قۇندىلىقتارىنىڭ ورنىن اۋىستىرۋ جانە جەتكىزۋ بويىنشا راسىمدەردى ۇيلەستىرۋ؛

جۇمىلدىرۋ رەزەرۆىن قالىپتاستىرۋ مەن ساقتاۋ شىعىندارى جونىندەگى ۇسىنىستاردى ۇكىمەتكە ەنگىزۋ.

جارلىقتىڭ باسىم بولىگى قول قويىلعان كۇنىنەن باستاپ كۇشىنە ەندى.

الايدا ماتەريالدىق رەزەرۆتەرگە قاتىستى ءبىرقاتار ارنايى نورمالار 2027 جىلعى 1 قاڭتاردان باستاپ قولدانىلادى.