ۋكراينا قازاقستان رەسپۋبليكاسىنىڭ نارازىلىعىنا جاۋاپ بەرىپ، ءبىزدىڭ ەلدىڭ كاسپيي قۇبىر كونسورسيۋمىنىڭ ينفراقۇرىلىمىنا الاڭداۋشىلىعىن نازارعا العانىن حابارلادى، بۇل تۋرالى ۋكراينانىڭ سىرتقى ىستەر مينيسترلىگى حابارلايدى.
ۋكراينالىق ءسىم وكىلدەرى اتالعان ارەكەتتەر "قازاقستان رەسپۋبليكاسى نەمەسە باسقا ءۇشىنشى تاراپتارعا باعىتتالماعانىن" مالىمدەدى.
"ۋكراينانىڭ بار كۇشى بۇۇ جارعىسىنىڭ ءوزىن-وزى قورعاۋ تۋرالى 51-بابىن ىسكە اسىرۋ بارىسىندا تولىق ماسشتابتى رەسەيلىك باسقىنشىلىققا تويتارىس بەرۋگە باعىتتالعان. ۋكراينانىڭ ستراتەگيالىق تۇرعىدان نەگىزدەلگەن قورعانىس وپەراسيالارى جۇيەلى تۇردە باسقىنشىنىڭ اسكەري-ونەركاسىپتىك پوتەنسيالىن السىرەتىپ، قىلمىستىق باسقىنشىلىق سوعىستى جۇرگىزۋگە قاجەت زاتتارىن جويادى. ءبىزدىڭ ادامدار ءولىپ جاتىر. ۋكراينا باسقىنشىنىڭ شابۋىلدارىنا جاۋاپ رەتىندە سوققى جاسايدى"، - دەلىنگەن مالىمدەمەدە.
ۋكراينانىڭ سىرتقى ىستەر مينيسترلىگى چەرنومور ءوڭىرى مەن ونىڭ سىرتىنداعى ايماقتارداعى تۇراقسىزدىقتىڭ جالعىز فاكتورى مەن قاۋىپسىزدىك ارەكەتتەرىنىڭ سەبەبى رەسەيلىك باسقىنشىلىق بولىپ وتىرعانىن جەتكىزدى.
"بۇگىنگى الاڭداۋشىلىقتارعا قاتىستى قازاقستاندىق تاراپ جاقتان رەسەي فەدەراسياسىنىڭ ۋكرايناداعى ازاماتتارعا، تۇرعىن ۇيلەرگە، ازاماتتىق ينفراقۇرىلىمعا جانە ەلىمىزدىڭ ەنەرگەتيكالىق جۇيەسىنە باعىتتالعان سوققىلارىن ايىپتاۋدىڭ جوقتىعىنا نازار اۋدارامىز"، - دەلىنگەن رەسمي حابارلامادا.
وعان قوسا ۋكراينا باسقىنشىنىڭ سوعىستى توقتاتۋعا كۇشتەۋگە ارەكەت جاساۋعا شاقىردى.
"قورىتىندى رەتىندە قازاق ەلىنە اسقان قۇرمەتىمىز بەن دوستىق قارىم-قاتىناسىمىزدى راستايمىز"، - دەدى ۋكراينالىق ءسىم وكىلدەرى.
