پرەمەر-مينيستر ولجاس بەكتەنوۆ قازاقستانعا استانا حالىقارالىق فورۋمىنا قاتىسۋ ءۇشىن كەلگەن تۇركى مەملەكەتتەرى ۇيىمىنىڭ باس حاتشىسى كۋبانىچبەك ومىرالييەۆپەن كەزدەسۋ وتكىزدى، دەپ حابارلايدى Bairaqmedia.kz.
وندا جوعارى دەڭگەيدە قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرى، سونداي-اق تمۇ-عا مۇشە مەملەكەتتەر اراسىنداعى ءوزارا ىنتىماقتاستىقتى ودان ءارى كەڭەيتۋ جولدارى تالقىلاندى. قازىرگى ۋاقىتتا ۇيىم اياسىندا ءوزارا ءىس-قيمىلدىڭ جاڭا فورماتتارى قۇرىلىپ، الەۋمەتتىك ساياسات، قورشاعان ورتانى قورعاۋ، ونەركاسىپ، عىلىم، تەحنولوگيا جانە يننوۆاسيا سياقتى باسقا دا سالالار بويىنشا جۇمىس جۇرگىزىلىپ جاتىر.
ساۋدا-ەكونوميكالىق ىنتىماقتاستىقتى جانداندىرۋعا جانە ءوزارا جەتكىزىلىمدەر اۋقىمىن كەڭەيتۋگە نازار اۋدارىلدى. 2024 جىلى قازاقستاننىڭ تمۇ-عا مۇشە مەملەكەتتەرمەن تاۋار اينالىمى $11،4 ملرد-تى قۇرادى. سونىمەن قاتار قولدا بار الەۋەت اعىمداعى كورسەتكىشتەردەن ەداۋىر كەڭ ەكەنى اتاپ ءوتىلدى. وسىعان بايلانىستى ق ر پرەزيدەنتى قاسىم-جومارت توقايەۆ ساۋدا قاتىناستارىن ودان ءارى دامىتۋعا باعىتتالعان جەكە قۇجات ازىرلەۋگە باستاماشى بولدى.
كەزدەسۋ بارىسىندا گۋمانيتارلىق باستامالار دا تالقىلاندى. اقتاۋ تۇركى الەمىنىڭ مادەني استاناسى بولىپ جاريالاندى، وسى جىلدىڭ ماۋسىم ايىنان باستاپ الماتى تمۇ-نىڭ جاستار استاناسى بولادى. تۇركى مادەنيەتى مەن تاريحي مۇراسىن ساقتاۋعا جانە ناسيحاتتاۋعا باعىتتالعان ءىس-شارالار جوسپارلانعان.
كەزدەسۋ قورىتىندىسى بويىنشا تاراپتار ءتيىمدى ىنتىماقتاستىقتى ودان ءارى دامىتۋعا تولىق ىقپال ەتۋگە دايىن ەكەندىكتەرىن جەتكىزدى.
