مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تاۋارلاردىڭ شىعارىلعان ەلىن ايقىنداۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى، دەپ حابارلايدى Bairaqmedia.kz.

تۇزەتۋلەردىڭ ءبىرىنشى بلوگىندا قازاقستان تاۋار وندىرۋشىلەر ءتىزىلىمى (بۇدان ءارى – ءتىزىلىم) ەنگىزىلدى. «ەلەكتروندىق ۇكىمەتتىڭ» اقپاراتتىق-كوممۋنيكاسيالىق ينفراقۇرىلىم نىسانى رەتىندە جۇمىس ىستەيتىن تىزىلىمدە وتاندىق تاۋار وندىرۋشىلەر مەن ولار وندىرەتىن تاۋارلار تۋرالى مالىمەتتەر قامتىلادى. تىزىلىمگە ەنگىزىلگەن تاۋار وندىرۋشىلەرگە مەملەكەتتىك قولداۋ شارالارى قولجەتىمدى بولادى. سونداي-اق ولار مەملەكەت ساتىپ الۋلار مەن كۆازيمەملەكەتتىك سەكتور سۋبەكتىلەرىنىڭ ساتىپ الۋلارىنا قاتىسا الادى.

ءتىزىلىمنىڭ قولدانىسقا ەنۋىنە بايلانىستى بۇرىن تاۋاردىڭ شىعۋ تەگىن راستاۋ ءۇشىن پايدالانىلعان ست-KZ جانە يندۋستريالىق سەرتيفيكاتتارىن، سونداي-اق ساراپتاما اكتىسىن بەرۋ كەزىندە ءتارتىپتى بۇزعانى ءۇشىن بەلگىلەنەتىن اكىمشىلىك جاۋاپكەرشىلىك زاڭنامادان الىنىپ تاستالدى.

تۇزەتۋلەردىڭ ەكىنشى بلوگى ەلىشىلىك قۇندىلىقتار ينستيتۋتىن ودان ءارى جەتىلدىرۋگە باعىتتالعان. وسى ماقساتتا ۇكىمەت بەكىتەتىن قاعيدالارعا سايكەس، ءىرى تاپسىرىس بەرۋشىلەرگە ەل ىشىندەگى قۇندىلىقتاردى دامىتۋ باعدارلامالارىن بەكىتۋ جانە ىسكە اسىرۋ مىندەتى جۇكتەلەدى.

ونەركاسىپتى دامىتۋ ءۇشىن كەلىسىمشارتتىڭجاڭا ءتۇرى – كەپىلدەندىرىلگەن ساتىپ الۋ كەلىسىمشارتى ەنگىزىلدى. بۇل شارتقا سايكەس وڭدەۋشى كاسىپورىن ءوزىنىڭ ءوندىرىس الاڭىندا وندىرىلگەن تاۋارلاردىڭ كەپىلدى كولەمىن ۇزاق مەرزىمدى نەگىزدە جەتكىزىپ بەرۋگە مىندەتتەنەدى.

تۇزەتۋلەردىڭ ءۇشىنشى بلوگى كودتار مەن اتاۋلاردى جۇيەلەۋ ارقىلى تاۋارلاردى، جۇمىستار مەن كورسەتىلەتىن قىزمەتتەردى جىكتەۋدىڭ ءبىرىڭعاي جۇيەسىن قامتاماسىز ەتەتىن تاۋارلاردىڭ، جۇمىستاردىڭ جانە كورسەتىلەتىن قىزمەتتەردىڭ جالپى سىنىپتاۋىشىن ەنگىزۋدى جانە جۇرگىزۋدى كوزدەيدى.

تجكقجس-نى ەنگىزۋدىڭ نەگىزگى وڭ اسەرلەرى مىناداي: بارلىق جىكتەۋىش بىرىزدەندىرەلەدى؛ بۇكىل سالاداعى تاۋارلار مەن قىزمەتتەردىڭ تۇرلەرى، سيپاتتامالارى بارىنشا ناقتىلانادى؛ تاۋار اينالىمىن قاداعالاۋعا مۇمكىندىك تۋادى؛ ءبىرىڭعاي نومەنكلاتۋرا تۇزىلەدى؛ تاۋارلاردىڭ قاداعالانۋىن دۇرىس جىكتەۋگە جانە تۇپكىلىكتى سايكەستەندىرۋگە؛ كولەڭكەلى ەكونوميكانى مەيلىنشە ازايتۋعا مۇمكىندىك پايدا بولادى.