اقوردادا يران يسلام رەسپۋبليكاسىنىڭ پرەزيدەنتى ماسۋد پەزەشكياندى سالتاناتتى قارسى الۋ ءراسىمى ءوتتى، دەپ حابارلايدى bairaqmedia.kz.
مەملەكەت باسشىسى قاسىم-جومارت توقايەۆ ەلىمىزگە رەسمي ساپارمەن كەلگەن يران يسلام رەسپۋبليكاسىنىڭ پرەزيدەنتى ماسۋد پەزەشكياندى اقوردادا قارسى الدى.
سالتاناتتى راسىمدەر زالىندا قۇرمەت قاراۋىلى ساپ تۇزەپ، ونىڭ باستىعى مەملەكەت باسشىسى مەن يران يسلام رەسپۋبليكاسىنىڭ پرەزيدەنتىنە سالەمدىك بايانات بەردى.
كەيىن پرەزيدەنتتىك وركەستر ەكى ەلدىڭ مەملەكەتتىك گيمنىن ورىندادى.
ءانۇراندى تىڭداپ بولعاننان كەيىن قاسىم-جومارت توقايەۆ پەن يران يسلام رەسپۋبليكاسىنىڭ پرەزيدەنتى ماسۋد پەزەشكيان كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.
ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى.
كەيىن ەكى ەل كوشباسشىلارى شاعىن قۇرامداعى كەزدەسۋگە ءوتتى.
ساپار بارىسىندا تاراپتار جوعارى دەڭگەيدەگى كەلىسسوزدەر جۇرگىزىپ، ساۋدا-ەكونوميكالىق، كولىك-لوگيستيكا جانە مادەني-گۋمانيتارلىق سالالارداعى قازاق-يران ىنتىماقتاستىعىن ودان ءارى نىعايتۋ ماسەلەلەرىن تالقىلايدى.
ەسكە سالا كەتسەك، 10-11 جەلتوقسان كۇندەرى استاناعا يران يسلام رەسپۋبليكاسىنىڭ پرەزيدەنتى ماسۋد پەزەشكيان رەسمي ساپارمەن كەلەتىنىن حابارلاعان بولاتىنبىز.
