ءماجىلىستىڭ بۇگىنگى جالپى وتىرىسىندا دەپۋتات ءارى بەلگىلى سپورتشى ارداق نازاروۆ اناسىنا ارناپ قۇتتىقتاۋ ايتتى، دەپ حابارلايدى bairaqmedia.kz.
دەپۋتاتتىق ساۋال قويۋعا شىققان نازاروۆ رەسمي مالىمدەمەسىنە دەيىن اناسىنىڭ تۋعان كۇنىنە وراي ىزگى تىلەگىن جەتكىزدى.
«وسىندا وتىرعان بارلىق ازاماتتاردىڭ ارتىندا الەمنىڭ جارىق الەمىن سىيلاعان انالار تۇر. مەنىڭ اناشىمنىڭ بۇگىن تۋعان كۇنى، 70 جاسقا تولىپ وتىر. قۇتتىقتاۋعا رۇقسات ەتسەڭىز»، - دەگەن ول اناسىنا اق تىلەگىن جاۋدىردى.
ءسوز اراسىندا اناسىن قاتتى جاقسى كورەمىن دەگەن دەپۋتات اكەسى ەكەۋىنە ۇزاق عۇمىر تىلەدى.
«ءقادىرلى اناشىم، ءسىزدى تۋعان كۇنىڭىزبەن شىن جۇرەكتەن قۇتتىقتايمىن! ءسىزدىڭ مەيىرىمگە تولى جۇرەگىڭىز بەن جۇزىڭىزدەن توگىلگەن نۇرعا شومىلىپ ءوستىم. اناشىم، اكەتايىم ەكەۋىڭىز قۇستىڭ قوس قاناتىنداي ماڭگى بىرگە بولىپ، قۇداي بەرە سالعان نەمەلەرىڭىزدىڭ قىزىعىن كورىڭىزدەر. اناشىم، مەن ءسىزدى قاتتى جاقسى كورەمىن، ءسىزدىڭ الدىڭىزدا باسىمدى يەمىن. بارشاڭىزدىڭ انالارىڭىز امان بولسىن!»، - دەدى دەپۋتات.
بۇل تۋرالى جۋرناليست گۇلبانۋ ءانيات قىزى الەۋمەتتىك جەلىدەگى پاراقشاسىندا جازدى.
«كلاستاسىم بۇگىن دەپۋتاتتىق ساۋال جولداماس بۇرىن اناسىن تۋعان كۇنىمەن قۇتتىقتاپتى. ءبىر كۇنى پارلامەنتتە توي جاساپ جۇرمەسىن، قۇرسىن»، — دەپ جازدى جۋرناليست.
