الەۋمەتتىك جەلىلەردە ەرەكشە بالالارعا قاتىستى ورەسكەل ءارى زاڭسىز پىكىر بىلدىرگەن بلوگەرگە قاتىستى قىلمىستىق ءىس قوزعالدى. بۇل تۋرالى الماتى قالالىق پوليسيا دەپارتامەنتى مالىمدەدى، دەپ حابارلايدى bairaqmedia.kz.
"AUTISM KAZAKHSTAN" ۇلتتىق اسسوسياسياسىنا سوڭعى كۇندەرى ەرەكشە بالالاردىڭ اتا-انالارىنان كوپتەگەن شاعىم تۇسكەن. ولار بلوگەر رايحان جۇمامۇراتوۆانىڭ الەۋمەتتىك جەلىدەگى جازباسىنا نارازى بولعان.
اسسوسياسيا مالىمەتىنشە، بلوگەر @_a_k_o_n_i اتتى Instagram اككاۋنتىنان الماتىدا 23 تامىزدا بولعان قايعىلى جاعدايعا بايلانىستى جاريالانعان جازبانىڭ استىنا ەرەكشە بالالارعا قارسى «بالالاردى ءولتىرۋ» تۋرالى وشپەندىلىككە تولى پىكىر قالدىرعان. كەيىننەن بۇل اككاۋنت جابىلىپ نەمەسە قايتا اتالعان.
الايدا بلوگەردىڭ باسقا @ersaevna_ پاراقشاسىندا دا ەرەكشە بالالارعا قاتىستى پىكىرلەرى جاريالانعان. سول جازبالاردىڭ بىرىندە ول "مۇنداي بالالاردى ينتەرناتتارعا جابۋ قاجەت" دەگەن پىكىر ايتقان.
اتا-انالاردىڭ ايتۋىنشا، مۇنداي مالىمدەمەلەر قوعامدا رەزونانس تۋدىرىپ، ەرەكشە بالالاردىڭ قۇقىقتارىنا نۇقسان كەلتىرەدى. وسىعان بايلانىستى اسسوسياسيا باس پروكۋراتۋرا مەن ىشكى ىستەر مينيسترلىگىنە رەسمي تۇردە جۇگىنگەن.
بۇل دەرەككە بايلانىستى قىلمىستىق ءىس قوزعالدى. بلوگەردىڭ جەكە باسى انىقتالدى، زاڭ اياسىندا ءتيىستى شارالار قابىلدانادى. ەستەرىڭىزگە سالا كەتەيىك، قورلاۋ، الەۋمەتتىك الاۋىزدىقتى قوزدىرۋ، قاتىگەزدىك پەن زورلىق-زومبىلىقتى ناسيحاتتايتىن كەز كەلگەن ارەكەت ءۇشىن قىلمىستىق ءارى اكىمشىلىك جاۋاپكەرشىلىك قاراستىرىلعان. قۇقىققا قارسى ارەكەتكە شاقىراتىن كەز كەلگەن پىكىرگە جول بەرىلمەيدى، – دەپ مالىمدەدى الماتى قالالىق پوليسيا دەپارتامەنتى رەسمي تۇسىنىكتەمەسىندە.
"AUTISM KAZAKHSTAN" اسسوسياسياسى بۇل جاعدايعا قوعامنىڭ نازارىن اۋدارىپ، ەرەكشە بالالارعا قۇرمەتپەن قاراۋ — ءار ازاماتتىڭ مىندەتى ەكەنىن اتاپ ءوتتى.
