ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا كۇماندى جانە ءتيىمسىز الەۋمەتتىك تولەمدەردى توقتاتۋ ماسەلەسىن ءتۇسىندىردى، دەپ حابارلايدى bairaqmedia.kz.
Sputnik.kz جازۋىنشا، قازىرگى كەزدە مينيسترلىكتە ساراپشىلار توبى جاساقتالدى. ولار كۇماندى جانە ءتيىمسىز الەۋمەتتىك تولەمدەردى الىپ تاستاۋعا قاتىستى ناقتى ۇسىنىستاردى ازىرلەيدى. پرەمەر-مينيستر بۇل جۇمىستى 1 جەلتوقسانعا دەيىن اياقتاۋدى تاپسىرعان بولاتىن.
ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا تولەمدەر بويىنشا ءبىر مىسال كەلتىردى.
"مىسالى، بۇگىندە مۇگەدەكتىگى بار بالانى ۇيدە وقىتۋ ءۇشىن اتا-اناعا جەرگىلىكتى بيۋدجەتتەن تولەمدەر بەرىلەدى. 500 تەڭگەدەن 1000 تەڭگەگە دەيىن، 300 تەڭگەدەن 3 000 تەڭگەگە دەيىن الەۋمەتتىك تولەمدەر قاراستىرىلعان. ال كونستيتۋسيا بويىنشا ءاربىر اتا-انا ءوز بالاسىنا جاۋاپتى، ونى وقىتۋعا دا، باسقا جاعدايلار جاساۋعا دا قۇقىلى ءارى مىندەتتى. ال مەملەكەت ءوز تاراپىنان مۇگەدەكتىگى بار بالا تىركەلگەن مەكتەپكە جوعارى تاريفپەن اقشا بەرەمىز، وعان قوسا، اتا-اناسىنا دا تولەم بەرىلەدى. مىنە، بۇل – ادىلەتسىزدىك. سوندىقتان وسى نورمالار قايتا قارالادى"، - دەدى جاقىپوۆا ماجىلىستە وتكەن بريفينگتە.
