كورەياعا جۇمىسقا كەتتىك دەگەن بىرنەشە جەرلەسىمىزدىڭ تاياۋ شىعىستاعى زاڭسىز ماركازدارعا اتتانعان. بۇل تۋرالى تۇركىستان وبلىسى ءدىن ىستەرى باسقارماسىنىڭ تاپسىرىسى بويىنشا تۇسىرىلگەن ۆيدەودا ايتىلادى، - دەپ حابارلايدى bairaqmedia.kz
سوڭعى ۋاقىتتا ءناپاقا تابۋ ءۇشىن كورەياعا كەتىپ جاتقان جەرلەستەرىمىزدىڭ قاراسى كوپ. الايدا، ولاردىڭ ءبارى بىردەي جۇمىس ىستەۋ ماقساتىندا بارمايدى دەيدى ماماندار.
شەكارادان ءوتىپ، «تاڭعى شىق ەلىنە» تابان تىرەگەن سوڭ سولاردىڭ كەيبىرى ءىز-تۇزسىز جوعالىپ كەتىپ جاتىر. ءبىرى زاڭ تالاپتارىن بىلمەگەندىكتەن ەلشىلىككە حابارلاسپايدى.ەندى ءبىرى جىمىسقى جوسپارىن جاسىرۋ ءۇشىن تۇلكىبۇلاڭ تاسىلگە سالادى. بۇلاي دەۋىمىزگە سەبەپ، كورەياعا جۇمىسقا كەتتىك دەگەن بىرنەشە جەرلەسىمىزدىڭ تاياۋ شىعىستاعى زاڭسىز ماركازدارعا اتتانعانى انىقتالىپ وتىر. مۇنداعى باستى سۇراق – سوندا جاستار جات جەردە قيىندىقتى ەڭسەرە الماي، رۋحاني تىرەكتى دىننەن ىزدەپ كەتتى مە؟ الدە و باستا حالىقارالىق تەررورلىق توپتارعا قوسىلۋدى كوكسەپ شەكارا استى ما؟ - دەلىندە بەينەروليكتە.
الەمدىك تاجىريبە كورسەتكەندەي، ەۋروپادا تەررورلىق اكت جاساعانداردىڭ كوبى ميگرانتتار ەكەن.
دەمەك، حالىقارالىق تەررورلىق توپتارعا كەلىمسەكتەردى ارباپ، بەلىنە بومباسىن بايلاپ، ءشاحيدسىڭ دەپ، ارقادان قاعىپ، قىلمىسقا يتەرگەن ءتيىمدى. قىزۋقاندى جاستار پسيەۆدوشەيحتاردىڭ شاتاق يدەولوگياسىن باعامداي المايدى. سوزىنە سەنەدى، امالىنا ەرەدى. ءقازىر «قاتيبا تاۋحيد ۆال-دجيحاد» تەررورلىق ۇيىمىنىڭ بەلسەندىسى سودين ساماركانديدىڭ زاڭسىز ورتالىعىندا بوس تاسالاپ جۇرگەن جەرلەستەرىمىزدىڭ بارى بەلگىلى بولدى. ەسكەرتەمىز، تاياۋ شىعىستاعى بەيرەسمي ماركازداردىڭ ءدىني ءبىلىم بەرۋگە ارنايى ليسەنزياسى جوق. ولاردى ءتۇر-تۇسىن ءبىلىپ بولمايتىن ءتۇرلى قورلار قارجىلاندىرادى. سوندىقتان، ونى قالاعان ۋاقىتتا كەز-كەلگەن ماقساتىنا قاراي پايدالانادى، - دەپ ەسكەرتتى ءدىني قىزمەتكەرلەر.
ەلىمىزدىڭ زاڭناماسىنا سايكەس، حالىقارالىق تەررورلىق ۇيىمداردىڭ قىزمەتىنە قاتىسۋ اسا اۋىر قىلمىس سانالادى. سوندىقتان، وت باسىپ، وپىق جەمەي تۇرىپ ويلانىڭىز.
