جاڭا سالىق كودەكسىنىڭ جوباسىندا قوسىمشا قۇن سالىعىنىڭ مولشەرى 16% بولادى، شەكتى مولشەر 40 ملن تەڭگە دەپ بەلگىلەندى. بۇل تۋرالى ءماجىلىستىڭ جالپى وتىرىسىندا پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين مالىمدەدى، دەپ حابارلايدى Bairaqmedia.kz.

ءمينيستردىڭ ايتۋىنشا، الەۋمەتتىك ماڭىزى بار تاۋارلارعا قوسىمشا قۇن سالىعى سالىنبايدى.

جاڭا سالىق كودەكسىنىڭ جوباسىندا دەپۋتاتتاردىڭ ۇسىنىسى بويىنشا مىناداي سالىق ستاۆكالارى ساقتالدى:

– الەۋمەتتىك ماڭىزى بار ازىق-تۇلىك ونىمدەرى، كىتاپ باسىپ شىعارۋ، ارحەولوگيا قوسىمشا قۇن سالىعىنان بوساتىلادى؛

– الەۋمەتتىك سالادا، دەنساۋلىق ساقتاۋدا قوسىمشا قۇن سالىعىنان بوساتىلعان دارىلىك زاتتاردىڭ الەۋمەتتىك تىزبەسىن ۇكىمەت انىقتايدى. تەك اقىلى مەديسينالىق قىزمەتتەرگە 10% قوسىمشا قۇن سالىعى سالىنادى؛

– الەۋمەتتىك سالاداعى كورپوراتيۆتى تابىس سالىعى كەزەڭ-كەزەڭىمەن وسەدى – 2026 جىلدان باستاپ 5%-عا جانە 2027 جىلدان باستاپ 10%-عا؛

– ارناۋلى سالىق رەجيمىندە تىيىم سالىناتىن ەمەس، رۇقسات ەتىلمەيتىن ءتىزىم ەنگىزىلەدى. تىيىم سالىنباعاننىڭ بارلىعىنا رۇقسات بەرىلەدى؛

– اۋىل شارۋاشىلىعى تاۋارىن وندىرۋشىلەر ءۇشىن «مينۋس 70%» جەڭىلدىك ستاۆكاسى كۇشىندە قالادى؛

– وڭدەۋ ونەركاسىبى ءۇشىن كورپوراتيۆتى تابىس سالىعى مولشەرلەمەسى 20% كۇيىندە قالادى؛

– بانك وپەراسيالارى بويىنشا دا قوسىمشا قۇن سالىعى الىناتىن بولادى. باسەكەلەستىكتى قورعاۋ اگەنتتىگى ۇكىمەتپەن بىرلەسىپ، باعانىڭ وسۋىنە جول بەرمەۋ ءۇشىن قولدانىستاعى تاريفتەردىڭ نەگىزدىلىگىنە تالداۋ جۇرگىزەدى.