ەلىمىزدە «قورقىت اتا» جاڭا ارنايى ەكونوميكالىق ايماعى (اەا) قۇرىلدى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى، دەپ حابارلايدى Bairaqmedia.kz.

قۇجاتقا سايكەس، اەا قىزىلوردا وبلىسىندا «باتىس ەۋروپا – باتىس جۇڭگو» حالىقارالىق كولىك دالىزىنە جاقىن 550 گەكتار اۋماقتا ورنالاسادى.

ارنايى ەكونوميكالىق ايماق اۋماعىندا زاماناۋي ونىمدىلىگى جوعارى، باسەكەگە قابىلەتتى وندىرىستەردى جەدەل دامىتۋ، قىزمەت كورسەتۋدىڭ ساپالى جاڭا دەڭگەيىن قالىپتاستىرۋ، ينۆەستيسيا تارتۋ، ەكونوميكا سالاسىندا جاڭا تەحنولوگيالار ەنگىزۋ، سونداي-اق حالىقتى جۇمىسپەن قامتۋدى ارتتىرۋ ءۇشىن مۇمكىندىكتەر جاساۋ جوسپارلانۋدا. اەا-نىڭ «باتىس ەۋروپا – باتىس جۇڭگو» حالىقارالىق كولىك دالىزىنە جاقىندىعى قازاقستان مەن ورتالىق ازيا نارىقتارىندا ءونىمدى ءتيىمدى وتكىزۋگە مۇمكىندىك بەرەدى، – دەلىنگەن ۇكىمەت حابارلاماسىندا.

اەا اۋماعىندا سالىقتىق جانە كەدەندىك جەڭىلدىكتەر ۇسىنا وتىرىپ، ارنايى قۇقىقتىق رەجيم ارەكەت ەتەتىن بولادى.

2049 جىلعا قاراي اەا-عا سالىناتىن ينۆەستيسيانىڭ جالپى كولەمىن 150 ملرد تەڭگەگە، شەتەلدىك سالىمداردى – 80 ملرد تەڭگەگە دەيىن جەتكىزۋ جوسپارلانىپ وتىر. تاۋارلار ءوندىرۋ مەن قىزمەت كورسەتۋ كولەمى 500 ملرد تەڭگە دەڭگەيىندە بولجانۋدا. قازاقستاندىق قامتۋ ۇلەسى – 90%-عا دەيىن جەتەدى.

25 جىل ىشىندە اەا كاسىپورىندارىندا 3 366 جاڭا جۇمىس ورنىن اشۋ كوزدەلگەن، قاتىسۋشى كومپانيالاردىڭ سانى 39-عا جەتكىزىلەدى.

سونداي-اق مۋلتيمودالدى اۋە حابتارىن قۇرۋ جونىندەگى ءىس-شارالاردى ىسكە اسىرۋ شەڭبەرىندە جانە كەدەن زاڭناماسىنىڭ تالاپتارىنا سايكەس، اتالعان قاۋلىمەن «وڭتۇستىك»، «استانا – تەحنوپوليس»، «سارىارقا»، «Alatau» جانە «اقتوبە» اەا-عا پورت ايماقتارى مارتەبەسى بەرىلدى.