قازاقستان رەسپۋبليكاسىنىڭ اتوم ەنەرگياسى جونىندەگى اگەنتتىگى ەلىمىزدەگى العاشقى اتوم ەلەكتر ستانسياسىن (اەس) سالۋعا ارنالعان كونسورسيۋم كوشباسشىسىن ايقىنداۋ جۇمىسىن اياقتادى. بۇل ۇدەرىس حالىقارالىق ساراپشىلاردىڭ قاتىسۋىمەن جۇرگىزىلدى، دەپ حابارلايدى Azattyq Rýhy.
الەمدىك كومپانيالارمەن كەلىسسوزدەر جانە «قىسقا ءتىزىم»
اشىق ءارى باسەكەگە قابىلەتتى ديالوگ اياسىندا جەتەكشى رەاكتور وندىرۋشىلەرىمەن كەلىسسوزدەر جۇرگىزىلىپ، ولاردىڭ وندىرىستىك نىساندارىنا ساپارلار ۇيىمداستىرىلدى. قورىتىندىسىندا كەلەسى ءتورت كومپانيا «قىسقا تىزىمگە» ەندى:
- «روساتوم» (رەسەي)
- «China National Nuclear Corporation» (جۇڭگو)
- «Électricité de France» (فرانسيا)
- «Korea Hydro & Nuclear Power» (وڭتۇستىك كورەيا).
ۇسىنىستار مازمۇنى جانە باعالاۋ كريتەرييلەرى
كومپانيالار تەحنيكالىق جانە كوممەرسيالىق ۇسىنىستاردان تۇراتىن كەشەندى قۇجاتتار توپتاماسىن ۇسىندى. وندا:
- قۇرىلىستىڭ بولجامدى قۇنى
- جوبانىڭ ىسكە اسۋ مەرزىمى
- قارجىلاندىرۋ تارتۋ مودەلدەرى
- جەرگىلىكتەندىرۋ تاسىلدەرى
- كادر دايارلاۋ مەن عىلىمدى دامىتۋ
- يادرولىق وتىنمەن ىقپالداستىق
- الەۋمەتتىك مىندەتتەمەلەر قامتىلدى.
ۇسىنىستار Assystem كومپانياسىمەن بىرلەسىپ ازىرلەنگەن ادىستەمە بويىنشا باعالاندى. كريتەرييلەر:
- اەس قاۋىپسىزدىگى
- تەحنولوگيالىق جانە قارجىلىق كورسەتكىشتەر
- حالىقارالىق تاجىريبە
- كادر دايارلىعى
- جەرگىلىكتەندىرۋ دەڭگەيى جانە ت.ب.
كونكۋرستىڭ قورىتىندىسى
باعالاۋ ناتيجەسى بويىنشا ەڭ ءتيىمدى ۇسىنىس «روساتوم» كومپانياسىنان ءتۇستى. قورىتىندى:
- 1-ورىن:«روساتوم» (رەسەي)
- 2-ورىن:«China National Nuclear Corporation» (جۇڭگو)
- 3-ورىن:«Électricité de France» جانە «Korea Hydro & Nuclear Power»
كەلەسى كەزەڭ: جوبانى ىسكە اسىرۋ
«روساتوم» قازاقستانداعى العاشقى اەس-تى سالۋعا ارنالعان حالىقارالىق كونسورسيۋمنىڭ كوشباسشىسى رەتىندە انىقتالدى. ءقازىر رەسەي تاراپىنان ەكسپورتتىق قارجىلاندىرۋ تارتۋماسەلەسى قاراستىرىلۋدا.
اتوم ەنەرگياسى اگەنتتىگى ءتيىمدى حالىقارالىق كونسورسيۋم قۇرۋ بويىنشا شەتەلدىك ارىپتەستەرمەن جۇمىسىن جالعاستىرادى.
