قازاقستان رەسپۋبليكاسىنىڭ اتومدىق ەنەرگيا جونىندەگى اگەنتتىگىنىڭ ءتوراعاسى الماسادام ساتقالييەۆتىڭ ايتۋىنشا، قازاقستاندا اتوم ەلەكتر ستانسياسىن سالۋ كەمىندە 14 ملرد دوللارعا تۇسەدى، دەپ حابارلايدى bairaqmedia.kz.

پارلامەنت كۋلۋارىندا جۋرناليستەردىڭ سۇراقتارىنا جاۋاپ بەرگەن ساتقالييەۆ اەس قۇرىلىسىنىڭ ناقتى قۇنى ازىرگە بەلگىلەنبەگەنىن اتاپ ءوتتى. ونىڭ ايتۋىنشا، الەمدىك تاجىريبەدە وسىنداي دەڭگەيدەگى اەس-تەر ءدال وسىنداي سوماعا باعالانادى. ءقازىر جوباعا قاتىستى تەحنيكالىق-ەكونوميكالىق نەگىزدەمە ازىرلەنىپ جاتىر. قۇرىلىس قۇنى تەحنيكالىق-ەكونوميكالىق نەگىزدەمە اياقتالعان سوڭ ناقتى بەلگىلى بولادى.

«قۇنى تەحنيكالىق-ەكونوميكالىق نەگىزدەمەگە سۇيەنىپ انىقتالادى. دەگەنمەن، جاھاندىق تاجىريبەگە سۇيەنسەك، مۇنداي دەڭگەيدەگى ستانسيالاردىڭ قۇنى شامامەن 14 ميلليارد دوللاردان باستالادى»، - دەدى ول.

ەستەرىڭىزگە سالا كەتەيىك، 2024 جىلى اەس سالۋ بويىنشا رەفەرەندۋم ءوتتى. رەفەرەندۋمدا 7 820 204 ادام داۋىس بەرىپ، 5 561 937 ادام اەس قۇرىلىسىن قولداعان. ال 2025 جىلعى 14 ماۋسىمدا بەلگىلى بولعانداي، ءبىرىنشى ستانسيانى رەسەيلىك «روساتوم»، ال ەكىنشى اەس-تى قىتايدىڭ CNNC كومپانياسى سالۋى مۇمكىن.

«روساتوم» مەن قازاقستان ەكى ۆۆەر-1200 رەاكتورىن سالۋعا ارنالعان جول كارتاسىن دا بەكىتتى. قۇرىلىس شامامەن 11 جىلعا سوزىلىپ، 2035–2036 جىلدارى اياقتالۋى مۇمكىن.