پرەمەر-مينيستر ولجاس بەكتەنوۆ قازاقستان اقش-تان كەلەتىن تاۋارلارعا باج سالىعىن ارتتىرۋدى جوسپارلاپ وتىرماعانىن ايتتى،دەپ حابارلايدى bairaqmedia.kz.

«بىردەن ايتايىن – ونداي جوسپار جوق. اقش-تىڭ جاڭا ەرەجەلەرىنە توقتالايىن. ءبىزدىڭ اقش-قا جىبەرەتىن ەكسپورتتىڭ جالپى كولەمىنىڭ 95%-ى وسى جاڭا ەرەجەگە جاتپايدى»، – دەدى بەكتەنوۆ ۇكىمەت وتىرىسىنان كەيىنگى بريفينگتە.

بەكتەنوۆتىڭ ايتۋىنشا، بۇل شەشىم ەل ەكونوميكاسىنا ەلەۋلى كەرى اسەر ەتپەيدى.

«اۋقىمدى كەرى اسەر بولمايدى. ءبىز امەريكالىق ارىپتەستەرىمىزبەن كەلىسسوزدەر جۇرگىزۋگە دايىنبىز جانە جۇرگىزىپ جاتىرمىز»، – دەدى ول.

ەستەرىڭىزگە سالا كەتەيىك، جاقىندا اقش پرەزيدەنتى قازاقستاننان كەلەتىن كەيبىر ونىمدەرگە 25 پايىزدىق باج سالىعى ەنگىزىلەتىنىن مالىمدەدى. بۇل شەشىمگە قاتىستى مەملەكەت باسشىسى قاسىم-جومارت توقايەۆ تا ءوز پىكىرىن بىلدىرگەن ەدى.