قاراعاندى وبلىسىندا رەلس اۋىستىرىپ جاتقان ءتورت جۇمىسشىنى جۇك پويىزى باسىپ كەتتى، دەپ حابارلايدى bairaqmedia.kz.

10 جەلتوقسان كۇنى ساعات 17:15-تە شەشەنقارا – قاراجانعىل ارالىعىنداعى مويىنتى – شىعاناق ۋچاسكەسىندە رەلس اۋىستىرۋعا ارنالعان جوسپارلى جۇمىستار كەزىندە جۇك پويىزى اپاتتى جاعدايدا توقتادى. وسى كەزدە جول بويىندا سارىشاعان ستانسياسىنىڭ جۇمىس توبى جوندەۋ جۇمىستارىن جۇرگىزىپ جاتقان.
قايعىلى جاعدايدىڭ الدىن الۋ مۇمكىن بولمادى. ءتورت قىزمەتكەر وقيعا ورنىندا العان اۋىر جاراقاتتارىنان كوز جۇمدى.

“قازاقستان تەمىر جولى” اق باسقارما ءتوراعاسىنىڭ تاپسىرماسىمەن ارنايى كوميسسيا قۇرىلدى. 

"وعان كومپانيانىڭ باس ينجەنەرى جەتەكشىلىك ەتەدى. كوميسسيا قۇرامىنا “قتج-جۇك تاسىمالى” مەن ماگيسترالدىق جەلى ديرەكسياسىنىڭ وكىلدەرى كىردى. كوميسسيا وقيعانىڭ سەبەپتەرىن انىقتاۋ ءۇشىن وقيعا ورنىنا اتتاندى”، – دەلىنگەن اقپاراتتا.