ۇلتتىق دومبىرا كۇنى قارساڭىندا حالىق اقىنى نۇرپەيىس ءبايعانيننىڭ شوبەرەسى نۇربەك الپامىس ۇلى بايعانين تاريحي مۇرانى جاڭعىرتۋ ماقساتىندا ەرەكشە جوبانى جۇزەگە اسىرۋدا، دەپ جازادى bairaqmedia.kz. ول ءوزىنىڭ باباسى – نۇرپەيىس ءبايعانيننىڭ ۇلى مومىن بايعانينگە جاساپ بەرگەن كونە دومبىراسىن قايتا جاساپ، ۇلت جادىن ءتىرىلتىپ وتىر.
اسپاپتىڭ ءتۇپنۇسقاسى تولىق ساقتالماعان. بۇگىنگە دەيىن دومبىرانىڭ تەك قۇلاعى جەتكەن. دەگەنمەن، ءدال وسى بولشەك نۇربەككە ۇلكەن شابىت سىيلاپ، تاريحي دومبىرانى ءتۇپنۇسقاسىنا بارىنشا جاقىن ەتىپ قالپىنا كەلتىرۋگە تۇرتكى بولعان كورىنەدى.
نۇربەك بايعانين ءقازىر ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ ۆيزۋالدى ونەر ماماندىعىنىڭ 3-كۋرس ستۋدەنتى.ول باباسىنىڭ دومبىراسى تۇتاس قازاق حالقىنا تيەسىلى مۇرا دەيدى.
«نۇرپەيىس اتامنىڭ قولىنان شىققان بۇل دومبىرا – ءبىزدىڭ اۋلەتتىڭ عانا ەمەس، بۇكىل قازاق حالقىنىڭ كيەلى مۇراسى. مومىن اتامنىڭ بالا كەزىندە بۇل دومبىرا سىنىپ، بىرنەشە رەت جاڭعىرتىلعان، نەگىزگى ءتۇپنۇسقادا دومبىرانىڭ قۇلاعى عانا ساقتالىپ قالدى. ءبىراق ءدال وسى بولشەك – تۇتاس تاريحتىڭ سيمۆولى ىسپەتتى. مەن وسى نەگىزدە دومبىرانى قايتا جاڭارتىپ، رۋحاني مۇرانى جاڭعىرتىپ جاتىرمىن»، – دەيدى جاس شەبەر.
ق. جۇبانوۆ ۋنيۆەرسيتەتىنىڭ جانىنان قۇرىلعان ونەر شەبەرحاناسىندا جاسالىپ جاتقان بۇل جۇمىس – تاريحي جادتى ءتىرىلتۋدىڭ، ۇرپاق ساباقتاستىعىنىڭ جانە ۇلتتىق ونەرگە دەگەن قۇرمەتتىڭ جارقىن كورىنىسى. وقۋ ورنىنىڭ وقىتۋشىلارى دا بۇل جوبانى جاس بۋىننىڭ تامىرىنا بەت بۇرىپ، رۋحاني بايلىقتى باعالاۋى دەپ ەسەپتەيدى.
