پويىزدا تابيعي گازدان ۋلانىپ، زارداپ شەككەندەردىڭ جاعدايى بەلگىلى بولدى، دەپ حابارلايدى bairaqmedia.kz الماتى قالالىق قوعامدىق دەنساۋلىق ساقتاۋ باسقارماسىنا سىلتەمە جاساپ.

وقيعا ورنىنا 13 جەدەل جاردەم بريگاداسى بارعان.

ۆەدومستۆونىڭ مالىمەتىنشە، بارلىعى 52 ادام زارداپ شەكتى، ونىڭ ىشىندە بالالار دا بار. زارداپ شەككەندەردىڭ ءبارى قاجەتتى مەديسينالىق كومەك الۋ ءۇشىن قالالىق اۋرۋحانالاردىڭ قابىلداۋ بولىمىنە جەتكىزىلدى.

تەكسەرۋ قورىتىندىسى بويىنشا 10 بالا اۋرۋحاناعا جاتقىزىلدى، ونىڭ ەكەۋى جانساقتاۋ بولىمىندە، قالعاندارى ءتۇرلى بولىمدەردە جاتىر.

قالعان ناۋقاستار تەكسەرۋ ناتيجەسىندە مەديسينالىق كومەك الىپ، تۇرعىلىقتى جەرى بويىنشا امبۋلاتورلىق ەم الۋعا جىبەرىلدى.

"اۋرۋحاناعا جاتقىزىلعان ناۋقاستاردىڭ جاعدايى دارىگەرلەردىڭ باقىلاۋىندا. ولاردىڭ بارلىعىنا قاجەتتى مەديسينالىق كومەك كورسەتىلدى"، - دەپ تولىقتىردى ۆەدومستۆو وكىلدەرى.