ChatGPT قازاقستاندا ققس تولەۋشى بولدى. بۇل تۋرالى مەملەكەتتىك كىرىستەر كوميتەتى مالىمدەدى، دەپ حابارلايدى Bairaqmedia.kz.

جاھاندىق سيفرلىق پلاتفورمالارمەن ءوزارا ءىس-قيمىلدى جەتىلدىرۋ اياسىندا 2025 جىلعى مامىردان باستاپ OpenAI، L.L.C. كومپانياسى شارتتى تۇردە تىركەلدى. بۇل – جاساندى ينتەللەكت سالاسىنداعى جەتەكشى امەريكالىق ۇيىم، كەڭىنەن تانىمال ChatGPT ينتەللەكتۋالدىق جۇيەسىنىڭ ازىرلەۋشىسى.

ChatGPT – بۇل جاساندى ينتەللەكتىگە نەگىزدەلگەن چات-بوت. GPT (Generative Pre-trained Transformer) تىلدىك مودەلى نەگىزىندە جۇمىس ىستەيدى جانە كەلەسىدەي مۇمكىندىكتەرگە يە:

• سۇراقتار مەن وتىنىشتەردى ءتۇسىنۋ؛
• ماعىنالى ءارى قيسىندى جاۋاپتار قۇراستىرۋ؛
• اۋدارما، حات جازۋ، كودتاۋ، وقۋ جانە باسقا دا سالالاردا كومەك كورسەتۋ.

ChatGPTء-تى ۆيرتۋالدى كومەكشى، كەڭەسشى، سۇحباتتاسۋشى نەمەسە شىعارماشىلىق پەن جۇمىسقا ارنالعان قۇرال رەتىندە پايدالانۋعا بولادى.

ەندى قازاقستان اۋماعىنداعى جەكە تۇلعالارعا قىزمەت كورسەتكەنى ءۇشىن ChatGPT قازاقستان رەسپۋبليكاسىنىڭ سالىق زاڭناماسىنا سايكەس قوسىلعان قۇن سالىعىن تولەيتىن بولادى.

كوميتەت سيفرلىق سەكتوردا اشىقتىقتى قامتاماسىز ەتۋ، زاڭنامانى ساقتاۋ جانە ءتيىمدى سالىق سالۋ باعىتىندا جۇمىسىن جالعاستىرادى.