تانىمال ءانشى تورەعالي تورەالىنىڭ جۇبايى تولقىن تۇراربەك قىزى الەۋمەتتىك جەلىدە كوپشىلىكتى تولعاندىرعان جازباسىن جاريالادى، دەپ حابارلايدى bairaqmedia.kz.

ايتۋىنشا، وتباسى ءبىر ساتتە ءومىرىن تۇبەگەيلى وزگەرتكەن كۇردەلى كەزەڭنەن وتكەن.

"ءبىر ءسات. ءبىر وقيعا. ءبىر شەشىم – ءومىرىمىزدى تۇبەگەيلى وزگەرتتى. سول كەزدە ءبىز كاۋسارمەن قىتايدا ەمدەلىپ جۇرگەنبىز. 3 جىل بويى توقتاۋسىز ەم. اۋىر دياگنوز. جاس وتباسى. ءار كۇن – سىناق. ال تورەم… ساحنادا تۇرىپ، ىشىندەگى داۋىلمەن ارپالىسىپ جۇرگەن اكە. كۇرەسىپ جۇرگەن قىزىنىڭ دەرتى… جۇرەكتى ءتىلىم-تىلىم ەتەتىن ءسات.

وقيعادان كەيىن قوڭىراۋ شالدى: "تولقىن… جاڭالىقتاردى كوردىڭ بە؟" داۋسىنداعى ءدىرىل ءبارىن اڭعارتتى. "ۋايىمداماڭىز. قورقاتىن دۇنيە جوق"، – دەدىم.

ارادا كوپ ۋاقىت وتپەي، تورەم قىتايعا كەلدى. "بىلەسىڭ بە، سەندەردى ساعىنىپ جىلايتىنمىن… بالكىم، بۇل دا ءبىر قايىر…" – دەدى. "توميريس ءومىر ءۇشىن كۇرەسىپ جاتىر. ءسىز دە كۇرەسىڭىز. حالىق كەشىرەدى. تەك توقتاماڭىز"، – دەدىم.

تورەم توقتاعان جوق. كەشىرىم سۇرادى. جەتتى. جەڭدى. اكە رەتىندە دە، ازامات رەتىندە دە – قۇلامادى، قايتا نىعايدى. بۇگىندە كاۋسار قايىرىمدىلىق قورى – سول كۇرەستىڭ دالەلى. قينالعان وتباسىلارعا جول كورسەتكەن، بالاسى ءۇشىن سىنباعان اكەلەرگە ءۇمىت سىيلاعان – ءبىزدىڭ تورەمىز. تورەم، ەلىڭىزگە بەرەرىڭىز ءالى دە كوپ. ەلىمىزدىڭ رۋحى – سىزدەي ازاماتتارمەن بيىك.

بۇگىن… مىنە، ءدال وسى ساحنادا تۇرىپ، بويىمدى تىنىش ماقتانىش كەرنەپ تۇر. ساحنا وزگەرمەگەن. ءبىراق ءبىز وستىك! قورقىنىشتاردى جەڭدىك! قاتەلىكتەردەن قورىقپاي، ولاردان شەشىم شىعارا بىلدىك. ءومىر وسىنىسىمەن باعالى"، – دەپ جازدى ول.