تانىمال ازىلكەش تۇرسىنبەك قاباتوۆتىڭ ءۇشىنشى قىزى ايارۋ الەۋمەتتىك جەلىدە اكەسىمەن قارىم-قاتىناسى تۋرالى ايتتى، دەپ حابارلايدى bairaqmedia.kz. 

ايارۋ قاباتوۆانىڭ ايتۋىنشا، قوعامداعى ءتۇرلى پىكىرلەر مەن سىنعا قاراماستان، ول ءارقاشان اكەسىن جاقسى كورىپ، وعان ەرەكشە قۇرمەتپەن قارايدى.

«ءقازىر ءبارى ونىڭ جامان ادام ەكەنىن ايتىپ جاتىر. ءبىراق ول مەن ءۇشىن ءاردايىم ەڭ جاقسى اكە بولىپ قالا بەرەدى. مەن ونى بۇل ومىردە بارىنەن قاتتى جاقسى كورەمىن. كۇيەۋ رەتىندەگى رولىندە ءوزىن كورسەتە الماعان شىعار، ءبىراق اكە رەتىندەگى رولىندە ول ناعىز “اكە” اتاعىنا لايىق. وسى جىلدار بويى بىزگە دەگەن ماحابباتىن ۇنەمى سەزدىرىپ كەلەدى. ءقازىر ارامىز جاقسى، ءبارىن اشىق سويلەستىك»، – دەپ جازدى ايارۋ.

ول سونداي-اق جەلىدە اكەسىنە ايتىلىپ جاتقان اۋىر سوزدەرگە كۇيىنەتىنىن دە جاسىرمادى.

«ماعان جاقىن ادامدى جامانداعان پىكىرلەردى وقۋ وتە اۋىر. ونداي كەزدە ونى بار كۇشىڭمەن قورعاعىڭ كەلەدى. ءبىراق مەنىڭ قورعانىسىمدى ەشكىم بايقامايدى»، – دەدى ول.

ايتا كەتەيىك، بۇعان دەيىن پروديۋسەر ءمولدىر مۇقانوۆا ازىلكەش تۇرسىنبەك قاباتوۆپەن رەسمي تۇردە اجىراسقانىن مالىمدەپ، ولاردىڭ نەكەسىنە 14 جىل بۇرىن ءۇشىنشى ادامنىڭ ارالاسقانىن ايتقان بولاتىن. وسىدان كەيىن جەلىدە قاباتوۆقا قاتىستى ءتۇرلى پىكىرلەر ايتىلىپ، كەيبىر قولدانۋشىلار ونى سىنعا العان ەدى.