بالعىنبەك يماشيەۆتىڭ ۇلىنان تۋر ساتىپ العان تاعى 39 ادام قاجىلىقتان قاعىلعان، دەپ حابارلايدى bairaqmedia.kz

ەلىمىزدىڭ تۇكپىر-تۇكپىرىندەگى تۋريستەر اقشاسىن قايتارا الماي ءجۇر. بۇگىن الماتىداعى زارداپ شەگۋشىلەر پوليسيا باسقارماسىنا بارىپ، تەرگەۋدىڭ قالاي ءجۇرىپ جاتقانىن بىلۋگە تىرىستى. 

19 ساۋىردە مەن ءوزىم ۇشۋىم كەرەك ەدى. ءبىراق، سول ۋاقىتتان بەرى ەشقايدا ۇشقان جوقپىز. اقشامىز دا قايتارىلماي جاتىر. ەڭ ءبىرىنشى جۇماعا دەيىن دەگەن. ەڭ سوڭعى ۋادەسى قۇربان ايتقا دەيىن قايتارامىز دەگەن. ديرەكتورى يماشيەۆ دانيار دەگەن جىگىت، - دەدى الماتى قالاسىنىڭ تۇرعىنى بەرىك مارجانوۆ.

ءارقايسىسى جولداما ءۇشىن شامامەن 500 مىڭ تەڭگەدەن تولەگەن. ياعني، بۇل توپتاعى ادامدارعا ايتىسكەردىڭ ۇلى جالپى سومماسى 20 ميلليون تەڭگە قارىز ەكەن. ولارعا مەككە مەن ءماديناداعى 3 جانە 4 جۇلدىزدى قوناقۇيلەر ۋادە ەتىلگەن. سان سوعىپ قالعاندار كومپانيانى الەۋمەتتىك جەلى ارقىلى تاپقاندارىن ايتادى. بالعىنبەك يماشيەۆتىڭ ءوزى جارنامالاعان سوڭ، قۇدايداي سەندىك دەيدى. ال، ءقازىر نە ءوزى، نە ۇلى بايلانىسقا شىقپاي وتىر ەكەن.

تاعى وقىڭىز: ايتىسكەر اقىن بالعىنبەك يماشيەۆتىڭ ۇلى الاياقتىق بويىنشا تەرگەلىپ جاتىر

ەسكە سالايىق، بۇعان دەيىن ءدال وسى كومپانياعا الدانعان 50-گە تارتا ادام جاپپاي پوليسياعا شاعىم تۇسىرگەن بولاتىن. ىلە-شالا دانيار يماشيەۆ ولاردان العان قاراجاتىن قايتارىپ بەرگەن. بۇل جولى دا زارداپ شەگۋشىلەر پوليسياعا جۇگىنگەن. ءسويتىپ،الاياقتىق دەرەگى بويىنشا قىلمىستىق ءىس قوزعالعان. 

قىلمىستىق ىس-جۇرگىزۋ كودەكسىمەن كوزدەلگەن بارلىق تەرگەۋ امالدارى جۇزەگە اسىرىلۋدا. ءتيىستى ساراپتامالىق زەرتتەۋلەر تاعايىندالدى. ءىس ماتەريالدارى مىندەتتى تۇردە سوتقا جولدانىلاتىن بولادى، - دەدى الماتى قالاسى پد رەسمي وكىلى سالتانات ازىربەك.