تۇركىستان وبلىسى، جەتىساي اۋدانى، العاباس اۋىلىنداعى بولعان الاپات ورتكە قاتىستى جاڭا دەرەك شىقتى، - دەپ حابارلايدى bairaqmedia.kz.

bairaqmedia.kz انىقتاپ بىلگەندەي، ورتتەن قازا تاپقان مارقۇمدار ءبىر اۋلەتتىڭ مۇشەلەرى. ولار كورشى اۋىلداعى اعاسىنىڭ ۇلىنىڭ سۇندەت تويىنان قايتىپ كەلە جاتىپ، العاباستاعى باۋىرىنىڭ ۇيىنە تۇنەگەن. 

سول تۇندە 360 شارشى مەترلىك كوتتەدجدەن ءورت شىعىپ، 12 ادام قازا تاپتى. ورتەنگەن ءۇي يەسىنىڭ وتباسى تۇگەل كوز جۇمعان. 

ال ءۇي يەسىنىڭ اناسى مەن اعاسى، سونداي-اق اعاسىنىڭ قىزى جانساقتاۋ بولىمىندە جاتىر.

قازا تاپقانداردىڭ اراسىندا 2009، 2010، 2012، 2015، 2017، 2019، 2021، 2024 جىلدارى تۋعان بالالار بولعان.