Taıaý Shyǵystaǵy áskerı-saıası ahýaldyń kúrt shıelenisýine baılanysty birqatar elde resmı túrde shekteýler engizilip, azamattyq avıasıaǵa arnalǵan áýe keńistikteri jabyldy, dep habarlaıdy Bairaqmedia.kz.
Kólik mınıstrliginiń málimetinshe, májbúrli sharalar qarýdy qoldaný qaýpi, navıgasıalyq júıelerdiń durys jumys istemeýi, áýe qorǵanysy júıeleriniń belsendiligi jáne azamattyq áýe kemeleriniń ushýy úshin joǵary táýekelderge baılanysty qabyldanǵan.
Sońǵy málimetke sáıkes, shekteýler kelesi elderde qoldanylady:
- Izraıl áýe keńistigi tolyq jabyq;
- Iran áýe keńistigi tolyq jabyq, (onyń ishinde Parsy jáne Oman shyǵanaqtary);
- Irak, Iordanıa, Lıvan zymyran men dron shabýyl qaýpine sáıkes ushýlardy ýaqytsha shekteý engizdi;
- Kýveıt, Bahreın, BAÁ-reısterdi shekteý jáne toqtatý, ishinara qaqtyǵys aımaǵyna jaqyn marshrýttardy buǵattaý.
İri halyqaralyq avıatasymaldaýshylar da reısterdi ýaqytsha toqtatty. Olardyń qatarynda Air France-KLM, United, American Airlines, Japan Airlines, Air Canada Dýbaı, Doha jáne Er-Rıadqa ushýdy toqtatty. Qatar Airways ushý kestesin retteıdi. Etihad resmı eskertý jasady. Emirates qaqtyǵys aımaǵyn aınalyp, ushýdy jalǵastyryp otyr.
Osyǵan baılanysty qazaqstandyq áýe kompanıalary qaýipsizdikti qamtamasyz etý maqsatynda Dýbaı men Doha qalalaryna birqatar reısti ýaqytsha toqtatty. Elimizden shetelge shyqpaqshy adam sany — 683 bolsa, shetelden elge oralatyn adam sany — 1051 adam. Jalpy alǵanda bul jaǵdaı 1 734 jolaýshyǵa áser etti, - delingen habarlamada.
Vedomstvo ókilderi Qazaqstandyq avıakompanıalardyń Parsy shyǵanaǵy elderine ushýǵa baǵyttalǵan reısterdi toqtata turýy aımaqtaǵy áskerı-saıası jaǵdaıdyń kúrt shıelenisýine negizdelgen májbúrli shara ekendigin atap ótti.
Áýe kompanıalary qabyldaǵan sheshim halyqaralyq tájirıbege sáıkes qabyldandy. Basty maqsat — jolaýshylar men ekıpaj músheleririniń qaýipsizdigin qamtamasyz etý. Qoldanystaǵy zańnamaǵa sáıkes jolaýshylar ystyq tamaqpen, qonaq úı jáne transfermen qamtamasyz etildi, - delingen habarlamada.
Toqtatylǵan nemese keıinge shegerilgen reıster boıynsha jolaýshylar tegin qaıta bron qoıa alady nemese áýe bıletteriniń qunyn tolyq qaıtaryp ala alady.
Kólik mınıstrligi avıakompanıalarmen birlesip jaǵdaıdy jiti baqylaýda, qajet bolǵan jaǵdaıda jedel sheshim qabyldap, kesteni qaıta qaraý jumysy júrgiziledi. Reıster jaqyn arada qaıta júzege asyrala bastaıdy.
