Qoǵam belsendisi Azamat Kárimov qoǵamdyq orynda temeki tartyp otyrǵan astanalyq polıseıge eskertý jasaımyn dep ózi aıyppul arqalady. Onyń ústinen quqyq qorǵaý organy qyzmetkeriniń talabyna baǵynbaý babymen ákimshilik is qozǵalyp, aıyppul salynǵan, - dep jazady Stan.kz.
Qoǵam belsendisi Instagram-daǵy jeke paraqshasynda oqıǵa bolǵan kúni telefonyna túsirip alǵan vıdeony jarıalady. Vıdeodan onyń qoǵamdyq orynda temeki tartyp otyrǵan polıseıge eskertý jasap, shaǵymdanatynyn aıtqanyn baıqaýǵa bolady.
"Saıabaqtar, býlvarlar – qoǵamdyq oryn. Sizdiń ústińizden shaǵymdanamyn", – deıdi vıdeoda Azamat Kárimov temeki tartyp otyrǵan polıseılerge.
Qoǵam belsendisi tyıym salynǵan oryndarda temeki tartý babymen shylym shekken polıseıdiń ústinen aryzdaný úshin polısıa qyzmetine júginedi. Polıseıler kelip, qujatyn surap, aryzdy tirkeý barysynda qoǵam belsendisi qyzmettik kólik nómirindegi jarnama ataýyn baıqap, polıseılerge buǵan tyıym salynǵanyn (Ákimshilik quqyq buzýshylyq týraly kodekstiń "Kólik quraldaryn paıdalaný qaǵıdalaryn buzý" baby) eskertedi.
Osy kezde polıseılerdiń biri "Meniń memlekettik nómirim nege unamaı tur?" dep shamdanady. Qoǵam belsendisiniń sózinshe, ol polıseıge dóreki sóılep turǵanyn aıtyp, qyzmettik kýáligin kórsetýdi suraǵan kezde polıseı telefonyndaǵy kamerany qosyp, vıdeoǵa túsire bastaǵan. Ol qoǵam belsendisinen zańdy alǵa tartyp aty-jónin, derekterin aıtýdy talap etedi. Al Azamat Kárimovtiń aıtýynsha, ol aryzdaný kezinde úsh ret qujatyn kórsetken.
"Zań atynan derekterińizdi aıtýdy talap etemin. Eger kedergi keltirseńiz, 667-bap ekenin eskertemin – polısıa qyzmetkeriniń talabyn oryndamaý. Zań atynan jeke derekterińizdi aıtýdy talap etemin. Aıtasyz ba? Siz polısıa qyzmetkeriniń talabyn oryndaýdan bas tartyp tursyz. Bas tartasyz ba?", – dep suraıdy polıseı vıdeoda qoǵam belsendisinen.
Al qoǵam belsendisi qandaı negizde surap turǵanyn aıtyp, aty-jónin aıtýdan bas tartyp, polısıa qyzmetkerinen kýáligin kórsetýdi talap etedi. Osy kezde polıseıler onyń qolyn qaıyryp alyp ketedi. Muny jelidegi vıdeodan aıqyn kórýge bolady.
