2 shildede Ázerbaıjan Respýblıkasynyń Syrtqy ister mınıstrligi Reseı Federasıasynyń Bakýdegi tótenshe jáne ókiletti elshisi Mıhaıl Evdokımovti mınıstrlikke shaqyryp, resmı narazylyq notasyn tabystady. Ázerbaıjan tarapy Reseıdiń ekijaqty qarym-qatynasqa keri áser etken áreketterin synǵa aldy. Bul týraly aqparat eldiń SİM resmı saıtynda paıda boldy, dep habarlaıdy Dalanews.kz.
Kezdesý barysynda mınıstr orynbasary Araz Ázimov 27 maýsymda Ekaterınbýrg qalasynda ázerbaıjandyqtardyń úılerine júrgizilgen reıdke baılanysty tereń alańdaýshylyq bildirdi. Bul operasıa kezinde eki azamat qaza taýyp, birnesheýi aýyr jaraqat alǵan. Ázerbaıjan tarapy qaza tapqandardyń denesindegi zorlyq belgileri men medısınalyq saraptama qorytyndysy Reseı tarapy taratqan resmı aqparatpen sáıkes kelmeıtinin atap ótti. Sonymen qatar, reseılik BAQ-taǵy etnıkalyq negizdegi jaǵymsyz rıtorıka men ázerbaıjan azamattaryna «etnostyq qylmystyq top» dep aıdar taǵý áreketteri qatań synǵa alyndy.
Baký Máskeýden bul oqıǵaǵa baılanysty tolyq ári ádil tergeý júrgizip, kinálilerdi jaýapqa tartýdy, sondaı-aq zardap shekkenderge ótemaqy tóleýdi talap etti. Ázerbaıjan tarapy bul ustanymdy Reseıdiń ishki isine aralasý retinde baǵalaý orynsyz ekenin alǵa tartty.
Sondaı-aq, kezdesýde «Sputnik-Ázerbaıjan» agenttigine qatysty júrgizilgen sharalarǵa baılanysty Reseı tarapynan aıtylǵan syn-eskertpelerge de jaýap berildi. Ázerbaıjan bul sharalardyń el zańnamasyna saı júrgizilgenin jáne qazirgi tańda tergeý amaldary jalǵasyp jatqanyn málimdedi. Máskeýdiń narazylyǵy negizsiz dep tanyldy.
Bakýdiń aıtýynsha, byltyrǵy jyldyń sońynda Ázerbaıjanǵa tıesili ushaqtyń Reseı áýe keńistiginde oqqa ushý faktisinen keıin tıisti sharalardyń qabyldanbaýy, sondaı-aq reseılik aqparat quraldary men keıbir resmı tulǵalardyń Ázerbaıjanǵa qarsy jalǵan aqparat taratýy da ekijaqty qatynasqa keri áser etip otyr.
Ázerbaıjan tarapy Reseıden bul oqıǵa boıynsha ashyq tergeý júrgizýdi, kinálilerdi jaýapqa tartýdy jáne keltirilgen zıandy óteýdi kútetinin málimdedi. Bul qadamdar ekijaqty qatynastaǵy shıelenisti joıý úshin mańyzdy dep sanaıdy.
Kezdesý barysynda sońǵy 4-5 aıda Reseıdiń qoǵamdyq-saıası qaıratkerleri men medıasy tarapynan Ázerbaıjannyń egemendigi men aýmaqtyq tutastyǵyna qarsy málimdemeler jıilegeni jáne bul faktorlar eki el arasyndaǵy qarym-qatynasty ýshyqtyra túskeni aıtyldy.
Ázerbaıjan tarapy Reseıdiń sońǵy áreketteri dostyq pen ózara qurmetke negizdelgen qatynasqa saı kelmeıtinin jáne bul jaǵdaı qosymsha shıeleniske sebep bolǵanyn resmı túrde jetkizdi. Baký Máskeýdi eki el arasyndaǵy shıelenisti azaıtý maqsatynda naqty ári tıimdi sharalar qabyldaýǵa shaqyrdy.
